Ministru Edukasaun Juventude no Desportu, Armindo Maia hateten, MEJD hakarak fó sai rezultadu prossesu selesaun no rekrutamentu ba professór voluntáriu ne’ebé pasa ba kontratadu.
“Prossesu rekrutamentu no selesaun ba professór voluntariu sira ne’ebé la’o iha tempu naruk hahu husi tinan 2021 mai to’o 2022, ita konsege halo selesaun dokumentus ba professor voluntáriu iha munisipiu 13 la inklui RAEOA hamutuk 2.910. Sira ne’ebé admitidu 1.539 no la admitidu 1.371,” nia hateten iha MEJD, Tersa (14/02/2023).
Husi sira ne’ebé admitidu aumenta tan professor sira ne’ebé mak husi programa eskola iha uma hamutuk 176, mak total professor voluntariu ne’ebé MEJD rekruta ba kontratadu primeira faze hamutuk 1.715.
Professor voluntariu 1.715 ne’ebé rekruta ba professor kontratadu kompostu husi Ensinu pre-eskolar hamutuk 121, ensinu baziku 894, ensinu sekundaria jerál 39, ensinu sekundária tekniku vokasional 126 no programa eskola ba uma hamutuk 176.
Rezultadu rekrutamentu professor voluntariu 1.715 ba kontratadu publika ona iha Jornal Repúblika no rezultadu sai ona, entaun MEJD tuir prosedimentu ne’ebé mak iha sei loke reklamasaun durante loron 15.
Sira bele halo reklamasaun iha nivel munisipiu, nune’e ema hotu labele konsentra iha MEJD, bazeia ba reklamsaun ne’e mak sira foin halo verifikasaun puramentu iha loron 28 fulan fevereiru.
Razaun fundamental husi eskola sira katak sira simu professor voluntáriu tanba professor balun mate no reforma, entaun hamosu problema seluk mak númeru professor voluntariu tinan ba tinan kontinua aumenta ba bebeik, maske, iha tinan 2013 hodi hasai ona sirkular ida katak hodi bandu maibé eskola sira nafatin simu.
Professor voluntariu mak hanesan, sira neebe hanorin voluntáriamente, parsial ka reklamante, iha tinan 2021 MEJD konsege halo reverifikasaun ba 642 eskola husi públiku no privadu sira professor voluntariu hamutuk 2.799.
Iha tinan 2022 nia laran iha tan lista adisional hamutuk 2.789 neebé aumentu númeru voluntáriu hamutuk 5.588, tanba nee iha fulan junu tinan 2022 wainhira halo aprezentasaun iha reuniaun konsellu ministru MEJD propoin atu halo selesaun rekrutamentu ba vagatura hamutuk 2.111.
Iha kategoria tolu ba professor voluntaria sira neebé MEJD halo selesaun primeiru prioridade ba professor voluntariu sira husi tinan 2003 to’o 2013, ne’ebé reklamante mai husi governasaun anterior.
Kategoria segundu fo prioridade ba professor voluntariu husi tinan 2007 too 2017 durasaun servisu too tinan 10 husi eskola públiku sira, no kategoria terseiru rekrutamentu bazeia ba nessesidade real husi eskola nian, ba professor voluntariu sira liu husi tinan 2017 bazeia ba lokalizasaun eskola liuliu eskola sira iha area rural.
Ho ida nee mak númeru professor kontratadu iha MEJD hamutuk 4.902, no Iha tinan 2022, professor 12 mak mate nunee ita iha professor kontratadu hamutuk 4.890, husi númeru ida nee, professor sira neebé mak ho idade reformadu hamutuk 1.478.
Kona-bá professor voluntáriu, MEJD finaliza ona alterasaun ba dekretu lei númeru 23/2010 iha loron 09 fulan dezembru, kona-ba estututu karreira no indikador ba professor ensinu baziku no sekundária.
Estatutu karreira dosente iha tinan 2022 no agora dadaun sirkula ona iha membru governu sira, hodi hetan apressiasaun atu nunee bele avansa ba ajendamentu reuniaun konsellu ministru iha tempu badak, Alterasaun nee, Fó vantajem ba ingressu espesial hodi define estatutu professor kontratadu ba permanente.
MEJD realiza ona prossesu regulamentu seleksaun ba professor voluntariu sira iha munisipiu 13, la inklui RAEO nunee total professor voluntariu neebé rekruta ona hamutuk 1.715 ba primeira faze, neebé mak fó sai ona jornal Repúblika.
Total vaga restu husi tinan 2007-2011 hamutuk 396, ho ida nee MEJD sei kontinua tan halo rekrutamentu ba segunda faze iha tinan 2023 aumenta tan ho vagatura hamutuk 156 mai husi professor neebé mak mate iha tinan 2022.
Nunee, vagatura neebé mak disponivel ba tinan ida nee ba segunda vaga hamutuk 552, lista naran ba professor voluntariu nian ba primeira faze publika ona iha jornal repúblika.
Iha fatin hanesan, Deputada Bankada PLP Domingas dos Santos informa, durante ne’e iha fiskalizasaun PN konsidera katak eskola privadu sira kualidade liu duke eskola privadu sira, maibé sira lamenta tebes ho salariu ne’ebé mak iha eskola privadu sira minimu tebes, maske kualidade no disiplina tebes.
