Dialogo nasional ne’e ho tema “Rona ami labarik nia lian hodi asegura no realiza ami nia direitu”.

Prezidente INDDICA, Dinorah Granadeiro, hatete, Prezidenti Repúblika dekreta ona data eleisaun, tanba ne'e hala'o diálogu nasionál atu fó oportunidade ba labarik sira hodi hato'o sira nia preukupasaun, problema no dezafiu ne'ebé sira infrenta, atu nune'e nain ulun sira bele rona rasik sira nia preokupasaun.

“Tanba ne'e  aproveita oportunidade ida ne'e  labarik no estudantes sira atu hato'o sira nia preukupasaun ba nain ulun sira,”dehan nia iha Salaun CCD, kinta ne’e (16/02).

Nia dehan, tuir observasaun INDDICA nian hatudu, partidu polítikus no kandidatura sira sempre utiliza labarik iha sira nia atividade konsolidasaun no kampaña.

Nune’e, INDDICA husu ba na’in ulun sira atu labele utiliza labarik sira iha atividade kampaña ka konsolidasaun.

Nia dehan, maibé bainhira partidu politiku sira ukun karik, bele tau mós prioridade ba asuntu labarik.

Iha fatin hanesan, Reprezentante labarik iha TL, Olivio Almeida de Araújo, durante ne’e labarik sira seidauk goja sira nia direitu ho diak.
Tan ne’e husu ba instituisaun hotu atu iha seriedade luta ba labarik sira nia direitu, liu-liu iha área edukasun, saúde, justisa, nutrisaun no seluk-seluk tan, nune’e labarik sira iha Timor-Leste bele goza sira nia direitu tuir konstituisaun haruka.

Nia hatutan, problema sira ne'ebé akontese bebeik mak hanesan ifranstrutura eskola nian, saúde no seguransa hasoru labarik liliu ba maluk difisiensia sira. Edukasaun ba maluk difisiensia sira iha ensinu pre-primaria, presiza asesibilidade ba sira, intermus iha prosesu aprendizajen tenki akomoda mós manorin EhD sira.

Nia haktuir, violensia fizíku nafatin sai prátika iha eskola. Aleinde, inan aman sira mós sei haruka labarik sira faan sasan hodi responde ba nesesidade uma laran nian.

Tan ne’e, nia agradese ba Governu no parseiru dezenvolvimentu sira, tanba durante ne’e halo ona esforsu oioin hodi bele asegura nafatin direitu labarik sira nian iha Timor-Leste.

Entretantu, Reprezentante UNICEF iha TL, Bilal Auren Durrani hateten, kuaze metade husi labarik sira iha Timor-Leste, moris iha liña pobreza, raes badak, iha 63% husi labarik ho idade tinan lima (5) hetan anemia.

Maibé husi sosiedade no inan aman sira ne’ebé fanu ona ba nasaun no Prezidente Repúblika rasik mós prioritiza ona labarik sira iha Timor-Leste hanesan prioridade aas liu ne’ebé defini ona katak, Timor-Leste ida ne’ebé la iha labarik ida mate hafoin moris mai no labarik idaidak tenke saudável, nutrida di’ak, apriende no seguru.

“Espera katak iha futuru buat ruma sei muda ba imi nia moris, ami sei la deskansa to’o labarik sira hotu iha Timor-Leste goza ona sira nia direitu hotu. Ita presiza komprimisiu no asaun lolos ho urjente, no mós rona labarik sira, servisu ho sira hodi dezenvolve politika no solusaun,”dehan nia.

Nune'e mós UNICEF fó hanoin ba lider atual sira hotu atu tau asuntu ba direitu labarik sira nudar asuntus sentral.

Enkuantu, iha diálogu ne'e partisipa husi Prezidenti Repúblika, membru governu, parseiru dezemvolvimentu no estudantes, Ema ho Difisiensia (EhD), labarik sira husi Tibar, labarik sira ne'ebé  faan sasan iha merkadu no dalan ninin.