“Labarik sira eskola goza sira nia direitu iha eskola, sira uza tempu livre mak halo servisu ne'e, sira ne'ebé mak fa'an sasan hanesan ha’u dehan 99% mak asesu ba edukasaun,” dehan nia iha Salaun CCD, kinta (16/02).

Prezidenti haktuir, labarik na’in 300 ne'ebé faan sasan iha dalan ninin no merkadu, maioria mai husi Rejiaun Administrativu Espesial Oekuse Ambeno (RAEOA).

"Husi labarik sira ne'e barak mak mai husi RAEOA, esforsu lubuk ida ami halo hela ho prezidenti Autoriedade atu hare oinsa bele regula labarik sira ne'e,”dehan nia.

Nia esplika, INDDICA mós halo hela koordenasaun ho Aportil no diskusaun ne’e sei iha prosesu nia laran, katak atu iha regulanentu ruma ne'ebé bele regula bainhira labarik sira asesu ba iha ró viajem mai Dili ou husi Dili ba RAEOA.

Nia dehan, labarik sira ne'ebé ajuda inan-aman fa'an sasan iha dalan ninin no merkadu tanba kestaun ekonomia ho rendimentu ne'ebé mínimu tebes.

No balun kuaze rendimentu la iha, maibé balun sira nia inan aman nia servisu diaria mak fa'an sasan duni entaun sira mós husu oan sira atu ajuda sira hodi bele fa'an sasan.

"Tanba labarik sira atrai liu ema boot sira, atrai liu ema sosa nain sira, duké inan aman, ne'e informasaun ne'ebé ami hetan asesimentu," tenik nia.

Aleinde, nia dehan, labarik sira balun hakarak rasik fa'an tanba sira senti katak ho situasaun ekonomia ne’e, sira labele hetan osan husi inan-aman entaun sira rasik hakarak fa'an hodi bele fasilita sira material eskola.

Nia haktuir, maske eskola públika sira iha Timor ne'e gratuita maibé sira presiza fasilidade sira seluk atu bele kompleta, entaun ida ne'e mak meius ida ne'ebé sira uza hodi bele kompleta nesesidade fámilia nian no mós bele desidi sosa rasik sira nia hakarak ho osan ne'ebé iha.

Entretantu, atividade sira ne'ebé INDDICA halo dala barak hetan informasaun husi labarik sira katak liliu liga ba asuntu edukasaun nian, sira sempre kestiona fasilidade eskola nian, distansia eskola nian ne'ebé dook fasilidade la iha atu fasilita sira.

Nune’e mós iha labarik balun ne'ebé iha kondisaun ekonomia lapermite atu sira kontinua asesu ba edukasaun. No asuntu balun ne'ebé INDDICA hetan hanesan violensia ne'ebé sira hasoru iha fámilia laran no mós iha sosiedade laran liga ho sira nia situasaun.

Enkuantu, atu hare ba kestaun ne'e mak, estadu tenki kria lei ruma ne'ebé regula konaba bandu labarik sira atu fa'an sasan no involvimentu labarik sira iha komérsiu.