LIKISÁ: Governu liu husi Ministériu Edukasaun Juventude no Desportu (MEJD) hala'o abertura ba prosesu aprendijazen ba anu letivu 2022 nian, iha eskola Santo Inasiu de Loiola Kasait.
Tuir Vise Ministru Edukasaun Juventude no desportu António Guterres hatete, objetivu husi abertura nee atu fó autorizasaun ba eskola hotu iha teritoriu laran tomak bele hala’o ona prosesu aprendijazen.
“Ohin ita halo abertura bá prossesu aprendijazem anu lektivu tinan 2022 nian iha eskola Santu Inasiu de Loiola, atu nunee eskola hotu iha territóriu nasional bele hala’o fila fali aktividade eskola nian iha tinan ida nee,” dehan nia iha Santu Inasio de Loiola, Kasait, segunda horseik (24/01).
Nia hatutan, total eskola iha Timor-Leste hamutuk 1,867 kompostu husi Ensinu Baziku to'o Ensinu Sekundariu Jeral inklui Eskola Tekniku Vokasional sira, ho ida nee MEJD espera katak iha tinan nee eskola hotu bele hala’o sira nia aktividade eskola nian ho diak.
Nunee, nia husu ba estudante sira atu uza didiak oportunidade ida nee, hodi esplora sira nia oportunidade matenek atu hatene liutan siensia ne'ebe sira aprende iha eskola.
Ho nunee, liu husi matenek mak bele dezenvolve nasaun RDTL ida ne'e, tanbá nee badinas aprende nafatin ho Espiritu, Inovativu no kreatividade.
Iha fatin hanesan, Diretór Eskola Santo Inacio de Loiola, Isaias Abilio Caldas, afirma, iha fatin ida nee eskola refere sei simu tan estudante hamutuk 170 husi EBC no ESG.
“Ita nia planu bá tinan ida nee ita sei simu estudante foun hamutuk 170, ho ida nee prosesu simu estudante foun mak hanesan estudante hotu feto ka mane tenke halo teste eskrita uluk, depois sira passa mak sira foin bele hakat ba iha intrevista oral ho inan-aman no estudante rasik,” dehan nia.
Nia esplika, materia ba halo entrevista ba inan-aman no estudante mak hanesan, matematika, portugués, ditado, ingles ho siensia naturais, husi teste nee rasik bainhira estudante ida aprovadu katak nia feto kaa mane liu iha teste ida nee mak foin bele tama iha eskola refere, hodi hala'o nia prosesu aprendijazen.
Asistente Editor: Saturnina da Costa
