“Seguransa alimentar nian ne’e dadus iha ona, ita servisu ho kompañia sira prepara hela atu hahú segunda faze meadu 20 fulan-Februari nia laran, ha’u hein katak sira bele konklui mais sedu posivel ho benefisiariu ne’ebé iha 60 mill itál ne’ebé sira sei bele halo distribuisaun,” dehan nia, hafoin hasoru malu PM, iha Palasiu Governu, Segunda (24/01).
Nia dehan, faze dahuluk nian ne’ebé halo ona kuaze maioria munisípiu sira simu ona mezmu seidauk hotu, tanba fatin balu atu asesu ba difisil iha tempu udan, tanba ne’e mezmu seidauk simu, maibé kompañia sira kompromete atu iha faze daruak sira ne’ebé iha lista verifikadu ona sei bele hetan sira nia direitu.
Dadus ne’ebé temi dadauk iha faze daruak nian 60 mill itál ne’e dadus mai husi munisípiu hotu katak, dadus mai mós husi Ministériu Administrasaun Estatal no Ministériu Solidariedade Sosial no Inkluzaun, ne’ebé prosesu la’o hela.
Faze dahuluk nian distribui ona ba komunidade vulnerable sira kuaze 30 mill itál benefisiariu, dadaun haree hela atu kontinua ba faze daruak nian, tanba presiza prepara sasan sira di’ak, konsolida lista para segunda faze distribuisaun bele efetivu liu tan.
“Dadus ba faze segundu nian seidauk tama hotu, maibé ita hein katak bele tama hotu para bele kumpri númeru ne’ebé ita tarjetu ona, ha’u la lembra iha ona dadus ema hira mais ita hein dadus tama mai,” dehan nia.
Iha faze dahuluk nian ne’ebé implementa ona kuaze munisípiu sira hetan hotu, maske seidauk hotu, maibé munisípiu lubuk ida hetan ona, nune’e mós MKAE halo faze ne’e mós haree mós ba iha kapasidade ekipa halo distribuisaun nune’e mós tempu udan kalendariu tempu atrazu sira ne’e mak hein tuir ida ne’e.
Produtu nafatin hanesan, liu-liu produtu nasionál hanesan fos rai, batar, fore, koto, foremungu, produtu ne’ebé bele rai kleur nian, la’os modo tahan, sei la inklui produtu importasaun.
Entretantu, Prezidente Sentru Lojistika Nasionál (CLN), Gervasio Cardoso de Jesus da Silva hateten, kuandu orientasaun husi ministériu mai fatin iha ne’ebé hasoru problema CLN lalais bele halo intervensaun, tanba makina modernu loron ida bele dulas lalais no bele halo intervensaun kedas ba situasaun sira.
