Tuir Ministra Solidariedade Sosiál no Inkluzaun (MSSI), Armanda Berta dos Santos hateten, ho kriasaun institutu hirak ne'e bele iha ona autónomu finanseiru, administrasaun no bele jere rasik sira nia patrimóniu.
"Ho kriasaun institutu ida ne'e mós bele fó ona kompetensia ba sira atu bele dezeiña rasik sira nia programa no halo advokasia nomós halo dezeminasaun ne'ebé mak di'ak atu bele halo protesaun ba labarik sira iha Timor- Leste,”dehan nia liu husi diskursu iha salaun MSSI, tersa nee (25/01).
Ho nunee, Governante nee hatutan, Governu iha komprimisiu bo'ot tebes hakarak atu halo protesaun ba labarik sira neebé iha risku, nunee dignifika labarik sira nia moris liu husi lei no konvensaun neebé Timor-Leste.
Enkuantu, Ministra ne'e mós hato'o parabéns ba Prezidente eleitu husi Intitutu Defeza Direitu ba Labarik, atu hametin nafatin liña kordenasaun hodi hala'o servisu ne'ebé di'ak liu tan iha futuru.
Iha fatin hanesan, Prezidente Institutu Defeza Direitus ba Labarik.IP, Dinorah Granadeiro, husu atu lei ba protesaun labarik bele aprova hodi bele fó espasu ba institutu atu bele halo servisu di'ak liu tan.
Nia akrsente, ho lei ne'ebé iha baze legal ba ninia lala'ok servisu atu be fó espasu hodi redús labarik sira no lori labarik sira ba moris di'ak liu tan iha futuru.
Entrentantu, iha serimonia tomada posse ne'e hetan partisipa husi Ministra Soliedariedade Sosial no Inkluzaun, Armanda Berta, vice Ministru Justisa, José Edmundo Caitano, Ministra Saúde, Odete Maria Freitas Belo, Prezidente INSS, Longuinhos Armando Leite, Diretór Jéral, Rui Manuel Expostu no mós Diretór nasional no Munisipiu sira husi MSSI.
Asistente Editor: Saturnina da Costa
