Loron 16 Outubru sai nu’udar loron istoriku ba jornalizmu tanba iha loron ne’e iha tinan 1975, jornalista estranjeiru na’in lima hetan oho iha Balibo, ne’ebé koñesidu ho Balibo Five.
“Iha 16 Outubru 1975, Jornalista na’in 5 husi Media Australia, sira husi nasionalidade ne’ebé diferente, Australianu, Novazelandeza noIngles Grabritania, mate iha Balibo, ne’ebé hetan asisinatu ne’e husi militar Indonezia ninian,” deklara Prezidente Konsellu Imprensa Virgílio da Silva Guterres liu husi sorumutu ho asosiasaun no instituisaun media sira, Sesta (29/11).
Nia dehan, Konsellu Imprensa hamutuk ho instituisaun jornalista sira konkokorda katak Timor Leste presiza mós loron espesial, atu komemora Liberdade Imprensa ninian.
“Ba oin tenke komemora hodi hanoin hikas ita-nia maluk jornalista na’in 5 ne’ebé militar Indonezia sira oho, hahú kedas iha 16 Outubru 1975, molok invasaun mai Dili, iha 7 Dezembru,” dehan Virgilio hodi esplika kona-ba razaun hili loron ne’e sai loron importante ba jornalista TL, Sesta (29/11).
Virgilio hatutan, KI hamutuk ho asosiasaun no instituisaun media sira deside no sei propoin ba PN atu hetan rekoñesimentu.
“Ohin ita halo ona deklarasaun, tanba agora parlamentu sei iha sesaun kona-ba orsamentu estadu ninia, maibé iha tempu badak konselu imprensa sei hato’o nia relatoriu tinan ida ne’e nia ba Parlamentu, i iha okaziaun ida ne’e sei hato’o ofisialmente proposta ne’e ba parlamentu,” nia informa.
Nia dehan, imprensa sai nu’udar komponente importante ida iha sosiadade demokratiku. Tan ne’e presiza mós iha loron espesial ba imprensa sira.
“Ita koalia demokrasia so bele atinje bainhira imprensa livre ne’e eziste, entaun setor seluk sira presiza loron komemora sira-nia dezafius, esforsu,” dehan nia.
Tuir observasaun jornalista INDEPENDENTE, durante diskusaun mosu ideia barak ne’ebé kontrariu, maibé ikus mai iha duni solusaun no konkordansia hodi deside loron 16 Outubru nu’udar loron nasional ba liberdade imprensa.
