Sekretáriu Estadu Ensinu Sekundáriu Jerál no Ensinu Tékniku Vokasionál (SEESJ-ESTV) Domingos Lemos Lopes, hatete, uniforme eskolár ba estudante sira iha teritoriu tomak, dadaun ne'e Ministériu Edukasaun (ME), sei hadi'a pontus importante balun.

"Iha Fulan kotuk liu ba esbosu ne'e ita haruka ona ba PCM, maibé seidauk hetan nia aprovasaun no haruka mai fali ona iha ME no 20 Juñu mak ita sei aprezenta ba Ministra Edukasaun atu hetan aprovasaun para ita avansa ba faze segundu tuir mai. PCM haruka mai no loos duni ida ne'e presiza atu hadia nia pontus importante balun, ne'e mak nia modelu no nia kór sira ne'e hotu, ita tenke hadia buat sira ne'e hotu," dehan sekretáriu estadu, Domingos iha knaar fatin, Vila-Verde, tersa (11/06).

Nia hatutan, ba segundu periodu ne'e estudante sira atu uza uniforme eskolár ne'e depende ba esbosu lei ne'ebé mak sei aprezenta ba Ministra Edukasaun iha semana oin.

"Grasas a deus ida ne'e mak pasa ba faze daruak nia ita finaliza ona esbosu ida ne'e, signifika ba faze tuir mai ne'e ita Implementa ona," nia informa.

Diretór Eskola Sekundária Tékniku Vokasionál Industria no Teknolojia (ESTVIT) 28 Novembru, Manuel Amaral husu ba Ministériu Edukasaun (ME) atu aselera lalais uniforme eskolár. Tanba to'o agora estudante ba anu letivu foun ne'e la iha uniformidade.

"Uniforme eskolár ne'e to'o agora ita seidauk produz tanba desizaun husi Ministériu Edukasaun katak labele produz ka haruka estudante sira suku lai farda foun hodi hein desizaun foun husi Governu ba modelu farda ida de'it ba eskola sira iha teritoriu tomak. Tanba ne'e mak ami la haruka estudante foun sira suku farda ne'e. Kleur loos ona entaun ita husu ba Ministériu Edukasaun atu aselera lalais ona tanba estudante foun sira to'o agora la iha uniforme," dehan diretór Manuel.

Kona-ba uniforme, eskola sira ezizi atu aselera uniforme eskolár tanba atu tama fali tan ona ba periodu daruak maibé estudante foun sira mai nafatin ho uniforme tuan ka husi eskola anteriór sira nia entaun ketak loos ho estudante tuan sira.

" Ita hein desizaun husi ME mak foin bele, maibé to'o agora ita hein no tama ona ba periodu daruak ona mós ita nia oan sira nafatin mai ho farda husi eskola anteriór nia, uza faru mutin, entaun sira ketak loos ho estudante tuan sira ne'ebé iha nanis ona farda molok ME hasai sirkular," nia informa.

Estudante ESTVIT 28 Novembru, Augusto Perreira, hatete, Ministériu Edukasaun presiza haree ba asuntu uniforme eskolár nia ne'e, tanba dezde estudante foun sira tama ne'e la iha farda to'o agora. Entaun sira ketak loos ho estudante tuan sira.

" Ami tama ba areadór eskola ne'e ho farda modelu oioin de'it tanba ami ho faru mutin no ami-nia bin maun sira tuan ne'e uza farda ida antes iha ne'e, entaun ita keta-ketak loos iha areadór eskola nia. Ita husu Ministériu Edukasaun atu haree ba asuntu ne'e tanba dalaruma mós estudante foun husi eskola seluk tau hotu faru mutin ne'ebé dalaruma sira seluk mak halo problema mós ema deskonfia dehan ami hotu tanba ami ho estudante husi eskola seluk ne'e uza faru mutin hanesan de'it," dehan estudante.

Adjuntu Diretór Eskola Sekundáriu Jerál 4 Setembru UNAMET, Balide Alexandre da Costa, hateten dadaun ne'e eskola ne'e seidauk iha uniforme ba estudante anu letivu 2024, tanba desizaun husi Ministériu Edukasaun seidauk hatun ba iha eskola sira atu suku farda ba estudante sira.

"Uniforme eskolár ne'e até agora seidauk iha informasaun, la'ós eskola mak kansela uniforme ba estudante foun sira maibé ME mak kansela dehan sira fó modelu mak deside atu suku. Tanba ne'e mak ami sei hein desizaun husi ME bainhira mak sira bele hatun despaixu ida mai, para oinsá estudante sira-ne'e bele utiliza uniforme ona. Ne'ebé, ami hein de'it desizaun husi superior sira iha leten," nia dehan.

Tanba ne'e, nia parte rekomenda ba Ministériu Edukasaun atu aselera lalais desizaun kona-bá uniforme ba estudante sira, nune'e bele fasilita di'ak liután hodi identifika estudante sira bainhira halo problema ruma iha li'ur.

"Rekomendasaun ba Ministériu Edukasaun mak oinsá bele hatun lalais desizaun ida para estudante sira uza uniforme ne'e para fasil ita bele kontola no identifika estudante sira. Ne'ebé, espera sira bele toma atensaun ba ida-ne'e. Ita dehan aselera ne'e para evita difikuldade ne'ebé ami hasoru hanesan defísil ba ami atu kontrola kuandu labarik sira lauza farda halo problema iha li'ur ne'e. Hanesan akontese foin lalais, estudante eskola 4 Setembru UNAMET Balide ho eskola Nobel da Paz ne'e, susar atu ita identifika, tanba estudante anu letivu 2024 ne'e farda la iha" nia hateten.