Diretora EBC Farol, Filomena Fátima Belo Freitas hatete, EBC Faról to’o agora seidauk hetan orsamentu ba konsensaun eskolar, tan ne’e iha iha ezame periodu daruak manorin sira sei hakerek pontus ezame iha kuadru mak estudante sira hakerek tuir hodi priense tanba la iha osan atu print pontus ezame nian.

Diretóra ne'e dehan, iha ezame periodu dahuluk ne’ebé realiza ona iha loron 01-06 fulan-Abril, eskola halo ona imprestimu ba sira-nia parseriu hodi kopia pontus exame sira.

“Osan konsensaun eskolar to’o agora ami seidauk hetan hahú husi primeiru periodu, ami halo avaliasaun ba ezame premeiru periodu iha loron ida to’o loron neen abril, ami halo empréstimu liuhusi parseriu ne’ebé di’ak ho ami, nune’e impresta hodi halo hela fotokopia sira ne’e, ha’u-nia komisaun sira prepara ba iha ezame primeiru periodu nian ne’e hotu ona,” dehan Diretora ba Jornalista INDEPENDENTE iha nia knaar fatin Faról, Kuarta (12/06).
Kona-ba ezame periodu daruak, Diretora dehan, eskola sei fó deit pontus ezame masimál númeru sanulu (10) no minimál lima (5) no hakerek iha kuadru tanba osan la iha atu halo kopia ba pontus ezame nian.

“Agora tama iha segundu periodu ne’ebé sei hahú iha loron 15 Jullu ne’e ami eskola agora dadaun ne’e prosesu aprendisajen la’o normál hela fulan ida semana ida, depois restu ami tenki prepara ona pontu ezame, karik osan ne’e transfere seidauk di’ak maibé karik la tranfere sedu ami tenki hakerek iha kuadru númeru barak liu mak numeru sanulu no kiik liu númeru lina (5). Tanba osan la iha se ami impresta tan mak ema fó di’ak ema la fó osan ami atu foti iha ne’ebé,” Diretóra hato’o.
Relasiona ho osan konsensaun ne’ebé la seidauk tama, nia dehan, parte eskola hato’o ona ba iha Servisu Edukasaun Munispiu Díli (SEMD), nune’e bele hato’o ba iha Ministeriu Edukasaun (ME) atu hare ba asuntu ne’e.
Hatan ba kestaun ne’e, Diretór Servisu Edukasaun Munisipiu Dili, Sabino da Costa Pereira hatete, prosesu ba orsamentu konsensaun eskolar dadaun ne’e la’o hela, tanba dadus estudante nian hahú husi Ensinu Baziku to’o Ensinu Sekundariu Jerál no Tekniku Vokasional submete ona ba ME. Aleinde ba Pre-Primaria ezekuzaun orsamentu husi Ministeriu Administrasaun Estatal (MAE), prosesu la’o ona no hein ezekusaun.

“No orsamentu ne’e bazeia ba estudante, no kada estudante ida sei hetan dolar amerikanu rua ($2.00),” dehan Diretór.

Total estudante husi eskola EBC Fárol hamutuk 2097, kompostu husi feto 1.111 no mane 986.