Sekretáriu Estadu Ensinu Sekundariu Jerál no Tékniku Vokasional, Domingos Lopes Lemos hateten, apoiu ne'e ba dala rua ona, tanba antes ne'e ME mós entrega uluk ona kareta granmax ida ba ESTV Maliana.

Governante ne’e dehan, antes ne’e nia parte bá vizita ona Eskola ESTV Agrikola Natarbora hodi hare kondisaun Eskola nian, inklui prosesu sira hotu la'o di'ak tanba ME deside hodi apoiu kareta refere.

“Hakarak fó hatene ba públiku tomak katak kareta entrega ona ba eskola, kareta estadu nian maibé na'in ba kareta mak eskola, signifika katak jestaun tomak ne'e iha eskola, saida mak eskola halo inklui manutensaun sira," dehan Sekretáriu Estadu iha resintu ME Vila-Verde, Tersa (15/04).

Iha fatin hanesan, Diretór Eskola ESTV Agrikola Natarbora, Joaquim da Silva hatete, nia parte lori ESTV Natarbora nia naran hato'o agredese bá Ministeriu Edukasaun, tanba bele apoiu ona kareta ne'e bá sira hodi fasilita atividade eskola nian.

“Kareta ne’e, ami bele garante ninia manutensaun no mós kombustivel ba oin, ami garantia ho ami nia prátika sei hatudu rezultadu ne'ebé diak ba futuru,” dehan Diretór Eskola.

Enkuantu, orsamentu ne’ebé Ministeriu Edukasaun prevee hodi sosa kareta ne’e hamutuk rihun $17.