Molok atu halo termu aseitasaun, Ekipa Tekniku Servisu Resenseamentu MOP, Samuel Dany Soares husu ba komunidade sira ne’ebé afeita ba alargamentu estrada atu tetu no hare didiak estimasaun kustu ne’ebé governu fó.
Nia dehan, ba komunidade sira ne’ebé aseita ho kustu ne’ebé governu fó bele halo ona termu aseitasaun, maibé ba sira ne’ebé la satisfaz ho kustu ne’ebé fó, husu atu prense mós karta reklamasaun ne’ebé ekipa sira prepara ona.
“Tanba iha ne’e, estimasaun detallu ona, kustu estimasaun ne’ebé ekipa sira tau, bazeia ba estandar ne’ebé sira foti, karik ita boot sira la satisfaz, iha mós karta reklamasaun ita bele prense, ida ne’ebé mak konkorda ho presu ne’ebé atu halo indimizasaun ka dezprezu administrativu nian sei halo termu aseitasaun, nune’e ita enkamiña dokumentu ne’e ba Ministeriu Finansas hodi halo tranferensia ba ida-idak nia konta bankaria,” dehan Samuel Dany iha Sede Suku Kuluhun, Kuarta (16/04).
Iha termu aseitasaun ne’e komunidade maiora koopera ho kustu ne’ebé governu oferese, tanba kustu ne’ebé iha hahú husi dolar $500 to’o rihun $15 tuir modelu ka medida uma ne’ebé iha.
Enkuantu, remata asina termu aseitasaun ne’e, MOP sei lori lista entrega ba Ministeriu Finansas nune’e bele halo pagamentu bazeia ba estimsaun ne’ebé iha tuir dadus ne’ebé rekolla ona.
Entertantu, tuir dadus, komunidade afetada Suku Kuluhun hamutuk uma-kain 51 mak halo ona termu aseiatasun ho MOP.
