DILI: Ministériu Edukasaun (ME), bandu eskola públiku iha teritoriu hotu atu labele halo kobransa ba estudante sira kona-bá uniforme ka kualker asuntu sira.
Tuir Ministra Edukasaun (ME), Dulce de Jesus afirma, Ministériu Edukasaun (ME) hasai ona sirkulár ba eskola publika sira iha teritoriu, atu labele kobra osan husi estudante inan no aman sira hodi suku farda ba estudante sira iha tinan 2024
Nia hatutan, Ministériu Edukasaun foti desizaun hodi bandu eskola hotu labele kobra osan ba estudante sira kona-ba farda ne'e ho razaun atu labele hatodan gastu ne'ebé boot ba inan aman sira.
"Loos duni Ministériu Edukasaun hasai sirkulár ba eskola hotu atu hapara kobransa liuliu inísiu anu letivu foun ida ne’e, tanba ami haree ona iha eskola públika barak mak antes ne’e suku ona farda, depois sira obriga inan-aman sira tenke sosa ho presu ne'ebé karun, ami konsidera ida ne'e kontinua hatodan sira tanba dala ruma iha família ida iha oan rua ka tolu mak eskola iha fatin ida no la iha kapasidade atu hola farda ba sira-nia oan" Dehan Ministra Dulce, iha Lecidere, Sesta (12/01).
Ministra Edukasaun realsa, eskola públika iha teritóriu tomak labele suku farda ba alunu sira tamba Ministériu Edukasaun mak sei prepara modelu (motif) hodi suku ba saia, kalsa no kamiza ho folin ne'ebé bele ajuda inan aman sira
" Uniforme ba eskola públiku sira ne’e ita sei deside bazeia ba ba kores ho hena sira ne’ebé ita bele fásil hetan ho folin ne’ebé bele ajuda inan aman sira. No estudante sira ne’e sei uza kamiza kór mutin ho folin ne'ebé baratu," afirma nia.
Ministériu Edukasaun mak sei prepara farda nia amostra iha kada eskola sira, inklui alfaiate nune'e bele fasilita inan aman sita suku bazeia ba modelu ba kada estudante.
Nia husu ba eskola hotu atu kontinua hein desizaun ba suku farda foun maibé nia solisita ba eskola sira bele uza lai uniforme ne'ebé iha ona ba estudante tuan sira no ba foun bele uza farda metan ko mutin hodi hein farda foun ne'ebe sei mai iha tempu besik.
Iha sorin seluk Prezidente komisaun G neebe trata Asuntu Edukasaun, Juventude, Kultura no Sidadania, Armando dos Santos Lopes, sujere ba governu atu define uniforme farda eskola ba estudante sira iha teritóriu nasionál.
"Husu ba governu atu kria uniformizasaun farda ba estudante sira hotu iha teritóriu nasionál uniforme ne’e ho objetivu karik ita-nia oan sira tau farda eskola nia ita haree modelu ida de’it labele oioin no bele halo kmaan netik sira ne’ebé ekonomia la sufisiente" Nia informa
Tamba durante ne'e estudante sira suku farda kada tinan nune'e difísil oituan ba sira ne'ebé ekonomia la sufisiente satán ho inan-aman ne’ebé oan liu nain-4 ba leten suku fali farda foun kada tinan.
Nia hatutan, ho nune'e komisaun G sei bolu ministeriu kompotente hodi deskute no fo hanoin ba governu atu hamosu rezolusaun governu no karik Parlamentu Nasionál (PN) mós bele hasai rezolusaun ida hodi hateten governu halo uniformizasaun ba farda estudante hotu iha teritóriu nasionál.
