Tuir observasaun Jornalista INDEPENDENTE iha loza sira iha kapital Dili, folin foos sei aas nafatin.
Iha Kioske Mitu iha merkadu Taibesi, ne'ebé iha tinan kotuk asesu foos subsidiu husi governu, katak folin foos agora kontinua sa'e.
Na’in ba kioske Mitu, Fidelia dos Santos Correira hatete, foos hirak ne'ebé sira faan laiha mudansa tanba folin husi kompaña importadór mós sa’e.
Iha nia kioske, Fidelia fa’an foos 20 kilograma ho marka Takeshi ho folin $15.50 no 25 kilograma ho folin $18.75, no Manu Vitoria 25 kilograma ho folin $18.50.
“Folin foos kontinua sa’e beibeik tanba presu normal uluk kada saku la to'o $18.50,” dehan Fidelia iha iha merkadu Taibesi, Kinta (11/01).
Iha kioske Iza, faan foos 20 kg ho marka Gostu Loos no Manu Vitoria ho folin $15 kada saku.
Iha loza 198 WMH Unip. Lda. iha Maskarenha, UNDIL nia sorin, foos marka Takeshi 20kg ho folin $15.50, Manu Vitoria 20kg $14.50, Gostu Loos 20kg ho folin $14.50, no Folsom 20kg ho folin $18.75 kada saku.
Foos marka Takeshi 25kg ho folin $19.00, Gostu Loos 25kg $18.00, Lafaek 25kg ho folin $18.00, Ikan Mas 25kg ho folin $17.00, no Manu Vitoria 25kg ho folin $17.75 kada saku,
Komunidade Turiskai Preokupa
Komunidade sira husi Aldeia Tileru, Suku Manumera, Postu Administrativu Turiskai, Munisípiu Manufahi, preokupa ho folin foos ne'ebé kontinua sa'e.
"Iha Turiskai foos folin sa'e duni, iha loza kiik sira ne'e folin $18,50, sa'e liu mak $19, ne'e ba foos 20 kilo. Mina litru lima ne'e presu $7, $8 ne'e ba mina Bimoli ne'e," dehan Subega ba jornalista sira, iha Suku Manumera Kinta (11/01).
Tanba ne'e, nia husu ba governu atu buka meius oinsa atu povu bele sosa kotu foos.
Xefe Suku Orana, Domingos Ximenes Nunes husu ba governu buka solusaun ba folin sasan, liu-liu foos, ne'ebé kontinua sa'e.
Molok ne’e, Vise Ministru Augosto Junior Trindade hatete, governu iha obrigasaun atu buka dalan hodi hakaman povu nia sofrimentu, liu-liu ba folin foos. Dalan ida mak liu husi intervensaun hanesan halo ona iha tinan 2023.
"Foin tama tina foun, ami halo hela evaluasaun ba saida mak akontese ona iha fulan hirak liu ba, liu-liu iha Dezembru, depois ita haree medidas par atu kontinua (subsidiu foos) ka oinsa," dehan nia ba jornalista sira hafoin vizita produsaun industria pipa iha Tibar, Tersa (09/01).
MKI, nia hatutan, kontinua haree folin foos iha merkadu.
“Presu keta as loos ka normal hela ka ho governu nia intervensaun presu bele razoavel par komunidade sira bele asesu ka lae.”
"Maibé buat ne'ebé atu hatete katak ita nia stock nasional laiha, problema. Desde tinan kotuk, liu-liu atu tama Dezembru, foos tama mai barak, maibé hanesan ohin ha'u dehan ita-nia problema mak nafatin presu ne'e," dehan nia.
Tanba, nia hatutan, kapasidade komunidade balun atu sosa foos ladun to'o, entaun governu sei halo uluk evaluasaun ba situasaun hafoin haree saida mak governu atu halo hodi hakmaan povu sira ne'ebé ladun iha kapasidade sosa.
"Maibé agora daudaun hanesan ohin ha'u dehan ami hotu-hotu sei tuur hamutuk ho kompaña sira, nafatin halo evaluasaun depois hotu ami sei anunsia ba públiku kona-ba presu ne'e lao halo nusa," dehan nia.
Governu, nia dehan, kontinua servisu hamutuk kompaña importador sira atu bele asegura stock foos.
"Agora ita-boot sira (jornalista) akompaña, karik Sentru Lojistika Nasionál mós iha hela prosesu (sosa) foos atu tama mai, maibé ita nafatin ho kompaña privadu par servisu hamutuk par hodi haree, asegura de'it katak stock, primeiro liu mak ita haree katak stock nasionál ne'e, ba foos, iha hela," dehan nia.
