MDS Bandu Simu Xefe Negosiadór Xanana ho Atributu Partidu Featured

By INDEPENDENTE Marsu 09, 2018 1272
Xanana Xanana

DILI:Seidauk iha data serteza bainhira maka Xefe Negosiadór Prinsipál Fronteira Tasi Timor, Kay Rala Xanana Gusmão atu fila mai Timor-Leste, maibé Ministériu Defeza no Segunsa (MDS) aviza ona ba povu tomak atu labele utiliza atributu partidu nian bainhira ba hasoru-nia.

Ministru José Agostinho Sequeira ‘Somotxo’ hateten, bainhira simu xefe negosiadór ne’e labele partidariza ho atributu partidu nian.

Instituisaun defeza no seguransa sei hala’o ninia servisu hodi hapara ema ne’ebé uza interese partidu kuandu xefe negosiadór fila duni mai timor.

“Sei laiha atributu partidu nian iha laran, maibé sei utiliza de’it símbolu nasionál”, tenik nia, iha servisu fatin, Vila-verde, horisehik.

Ministru Somotxo refere liu ba partidu FRETILIN no CNRT, sira laiha dalan atu utiliza símbolu sira ne’e. Xanana Gusmão luta ba fronteira marítima la'ós lori partidu nia naran, maibé povu timor ninia destinu no futuru ba jerasaun sira nian.

Seidauk iha informasaun klaru, maibé bainhira Xefe Negosiadór ne’e fila MDS sei organiza seguransa ho di'ak hodi bele garante nafatin estabilidade.

Entretantu, Xefe Bankada PLP, Fidelis Magalhães, kongratula xefe negosiadór ho ekipa ne’ebé hala’o misaun di'ak tebes no susesu hodi marka tan istória foun iha ukun aan ne’e, tanba povu hetan ona nia direitu soberania tasi ne’ebé disputa hela durante ne’e.

“Ita hetan ona fronteira marítima maibé ba oin sei iha tan negosiasaun komersiál ba dada kadoras mai iha Timor. Tanba ne’e, presiza apoiu povu tomak nian ba maun boot Xanana Gusmão atu lori tan vitória mai povu”, dehan nia, iha Uma Fukun PN, horisehik.

Agora define ona FM presiza dada tan kadoras Greater Sunrise mai Timor atu bele benefisiária povu, maibé presiza governu ne’ebé forsa no iha polítika jestaun ne’ebé di'ak atu bele jere rekursu ne’e ho di'ak.

Iha fatin hanesan, Xefe Bankada CNRT, Arão Noe de Jesus, fó Parabéns ba Xanana Gusmão ho ekipa tomak tanba bele konkista vitória daruak ba libertasaun pátria nian liu husi definisaun soberania tasi.

Tuir nia, serimónia asina akordu Xanana la partisipa ne’e laiha problema, importante maka iha ona rezultadu hodi oportunidade atu bele negosia hodi dada kadoras mai iha Timor.

 

Rate this item
(0 votes)

Independente Digital TV