Negosiasaun ba fronteira marítima ne’e lidera husi maun boot Xanana Gusmão ba interese nasionál. Tanba ne’e, hein katak partidu ida labele partidariza asuntu ne’e hodi halo espekulasaun.

Rezultadu ne’ebé ohin loron iha ne'ebá susesu povu Timor-leste tomak nian, tanba antes iha kampaña tinan kotuk liu ba partidu hotu-hotu halo kompromisu hodi apoiu ba Xanana atu ba negoseia liña tasi Timor no Austrália.

Asuntu ne’e interese nasionál, tanba ne’e kuandu dehan iha limitasaun tempu hodi halo halo retifikasaun Parlamentu Nasionál liu husi komisaun permanente prontu konvoka plenária estraordinária ida hodi retifika akordu ne’e.

MKOT Hato’o Apresiasaun

Movimentu Kontra Okupasaun Tasi (MKOT) ne’ebé kompostu husi ativista, estudante, individu veteranu, organizasaun rezisténsia no solidariedade internasionál, hato'o apresiasaun ba povu Timor tomak tanba apoiu ohin loron nian bele hetan tan vitória ba soberanu tasi.

Diretór Ezekutivu La'o Hamutuk, Juvinal Dias hateten, movimentu hakarak apresia ba povu tomak ne’ebé nafatin firme hodi kontinua luta ba soberania. Apresiasaun mós ba nasaun rua ne’e ne'ebé konsege determina disputa hodi rekoñese tiha soberania TL no ba direitu maubere.

Iha fatin hanesan, veteranu Cornélio da Conceição Gama ‘L-7’ hatete, mehi ida ne’e dezde 1974 nunka atu konsege, maibé agora atinji duni ona. Tanba ne’e, agradese ba Austrália tanba rezolve problema ho ulun malirin domin no pás.

Nia husu nafatin ba povu tomak atu fo liman ba malu kontinua ezije ba governu rai rua ne’e hodi prosesa lalais kona-ba dezenvolvimentu Greater Sunrise nian.