Iha intervista Embaixadór Pakistan nian ba Indonézia no Timor-Leste, Ameer Khurram Rathore, apresia amizade ne'ebé harii tiha ona dezde Timor-Leste hetan independénsia to'o agora no hakarak kontinua relasaun di'ak liu iha futuru.
"Ha’u hasoru malu ho Ministru Defeza Timor-Leste hodi diskute malu no hakarak hatene saida mak ita bele dezenvolve setór defeza hodi estabelese relasaun ami gavel ne'ebé di'ak liu iha futuru," Dehan Ameer ba jornalista sira iha Gabinete Ministériu Defeza, Fatu-hada, (20/02).
Nia hatutan tan soru mutu ne'e hanesan soru mutu inisiál ida atu rona ideia sira husi Ministru Defeza Timor-Leste nian ne'ebé sei akompaña hodi hametin amizade entre defeza rua ne'e hodi dezenvolve setór defeza ida-ne'ebé di'ak liu iha futuru.
"Governu Pakistaun iha kompromisu atu kolabora iha setór hotu-hotu inklui setór defeza entre Pakistaun no Timor-Leste hodi komplementa malu hodi hala'o forsa atu mantein pás iha mundu internasionál," Sublina nia
Iha fatin hanesan, Ministru Defeza Timor-Leste nian, Donaciano Pedro Klamar Fuik esplika, iha vizita ida ne’e hanesan públiku hatene katak Pakistaun Timor-Leste nia país amigu ida, dezde primeiru kuandu Timor-Leste hetan nia prosesu konstrusaun estadu no nasaun, iha kedas misaun Nasoins Unidas, Pakistaun haruka nia kontinjénsia ida ka haruka nia batallaun ida kolokadu iha Timor-Leste ne’e hanesan peacekeeping force. Tanba ne’e mak Timor-Leste dezenvolve amizade di’ak tebes entre militár ho populasaun sira ho forsa Pakistaun ne’ebé mak altura ne’ebá koloka iha Timor-Leste.
"Iha Governu Timor-Leste nia naran, ha'u agradese ba Governu Pakistaun ne'ebé ajuda Timor-Leste hodi haruka balunun soldadu sira ba misaun manutensaun dame nian bainhira Timor-Leste hetan independénsia iha 1999," informa nia.
Nia dehan, vizita Embaixadór Pakistaun nian importante tebes tanba Governu Pakistaun hakarak Timor-Leste no Pakistaun atu kontinua hametin valór relasaun ida-ne'ebé forte no besik liu iha futuru.
“Ami diskute kona-ba kooperasaun bilaterál iha setór defeza no oinsá atu haruka membru balun husi Forsa Defeza Timor-Leste (F-FDTL) iha futuru besik atu fahe esperiénsia no formasaun hodi envolve Forsa Manutensaun Pas (PKF) iha nivel internasionál," hakotu nia.
