Nune’e, hanesan mós Marito Martins ho idade 42 ne’ebé buka moris liu husi pinera rai-henek hodi sustenta nesesidade uma laran nian.

Iha situasaun defisil ne’ebé Marito hasoru, loro-loron nia tenki ba iha mota laran area Komoro nian, atu pinera rai-henek hodi buka osan.

“Ha'u pinera rai-henek  ne'e hahú iha tinan 2008 to'o mai ohin loron ho nune'e  ha’u esforsu  makas hodi selu oan sira nia eskola, sustenta mós ba uma laran,” nia haktuir.

Tuir nia, bainhira Governu implementa estadu emerjensia, situasaun ida ne’e halo sira lahetan rendementu tanba laiha ema ida ou kareta ida mak atu mai sosa rai-henek ne’ebé sira pinera ona.

“Durante estadu emerjensia, ami pinera rai-henek nunka hetan osan, dala ruma nesesidade mós lasufisiente no labarik sira mós eskola tan, ida ne'e mak susar tebes mai  ami povu kiik,”dehan nia ba Onlin INDEPENDENTE iha mota komoro, foin lalais ne’e.

Maske loron manas, rai udan no sira senti kolen, maibé nafatin pasensia hodi hein ema atu mai sosa rai-henek refere, atu nune’e hetan netik osan uituan ba tahan kabun loron balun nia. Nune’e, mós hodi haree ba oan sira nia eskola.

“Kareta mós ladun tama hodi sosa ami nia rai-henek ne'e, ami pasiensia deit tanba osan laiha atu hola  hahán atu han, no mós atu selu de'it labarik sira nian eskola osan laiha,”tenik nia.

Nia konta tuir, bainhira dader rona manu komesa lian, nia hahú sai husi uma ba mota laran atu Pinera rai-henek.

Maske, pinera husi dader to’o lokraik hetan deit red ida, dala ruma mós metade deit, maibé ida ne’e, la halo nia atu lakon vontade.

Enkuantu, Marito mai husi Suku Fatubolu, Postu Administrativu Hatulia B, Munisipiu Ermera.

Nia iha oan na’in neen (6), na’in 1 eskola iha pre-primaria, na’in 2 iha ensinu baziku, na’in 2 seluk iha ensinu sekundaria no na’in ida seluk akaba ona nia estudu iha Universidade, maibé seidauk hetan servisu.

Entretantu, Bendito Gomes hanesa mós traballador pinera rai-henek iha mota Komoro, hato’o nia prekupasaun iha situasaun estadu emerjensia, rai-henek ne’ebé sira faan dala ruma ema la sosa. tanba ne’e, susar ba sira atu hetan osan hodi sustenta uma-laran.

Ho nune’e, sira husi Governu atu labele aumnenta tan estadu emerjensia, atu nune’e sira buka osan hodi sustenta uma-laran no mós haree oan sira nia eskola.

“Husu ba estadu ka governu la bele aumenta tan EE, tanba ida ne'e, ami buka osan atu sosa hahán mós araska , halo ami povu terus hela de'it,”tenik Bendito.

Tui nia, rai-henek ne’ebé sira faan to’o loron rua ka tolu hafoin ema mai sosa.

"Ha'u pinera rai-henek komesa iha tinan 2009 to'o mai agora, servisu pinera rai-henek ne’e mak hodi sustenta nesesidade uma-laran no labarik sira nia eskola durante tinan barak ne’e,”hakotu nia.