Cidália hatete, madre sira tenke besik bá fasilidade saúde sira tanba moras ne'ebé kona kada feto ida-idak iha sintoma la hanesan.
"Ha'u hanoin dalan di'ak liu mak ita hato'o ba madre sira atu hakbesik ba fasilidade saúde sira, tanba moras kankru ne'e ida-idak mak sente" dehan nia, iha sede Kongregasaun PRR, Manleuana, Sesta (8/10 ).
Tanba ne'e, Madre PRR ho madre sira seluk no mós feto foin-sa'e sira atu labele moe, maibé tenke hatudu hodi ko'alia sai ba médiku sira atu bele hetan asisténsia legál.
Cidália hateten, bainhira moras ne'e kona bele uza ai-moruk tradisionál, maibé importante mak tenke ba sentru saúde hodi bele deteta sedu.
Koordenadór PRR, Maria Eustácia hateten, saúde parte ida importante tebes, liuliu iha ba madre sira iha PRR tanba moras kankru ne'e bainhira kona sei prejudika atividade hotu.
Nune'e, komunidade PRR agradese tebes ba ekipa tomak husi Espoza PR nian tanba bele fahe ona informasaun kona-ba moras kankru.
Madre ne'e mós husu bá komunidade kongregasaun PRR nian atu tenke nakloke ba parte saúde sira bainhira mosu ona sintoma kona-ba moras kankru
Iha fatin hanesan, Diretór HNGV, Alito Soares hateten, HNGV sempre fahe informasaun sedu ba públiku liuhusi sosializasaun tanba iha TL kazu kankru susun mak barak afeta ba feto.
Maibé moras iha kankru tipu tolu mak governu rejista hanesan, kankru kemoterapia, radioterapia no kankru susun.
Husi tipu tolu ne'e, HNGV rejista hamutuk 400 resin seidauk konta husi klínika sira seluk ne'ebé iha munisipál no mós iha Dili laran.
"Dadus hamutuk 400 resin komesa husi 2015 mai to'o tinan ida ne'e, maioria mak moras kankru susun" dehan nia.
Nia hatutan, ho sosializasaun ne'ebé lao daudaun, feto sira maioria komesa iha ona koñesimentu tanba barak mak hakbesik ona ba sentru saúde hodi hetan asisténsia husi médiku sira.
