“Lú Olo, iha tempu ida nia diak, maibé ita tempu seluk nia moras, agora nia halo ona tratamentu, nia diak tebes ona. Tanba devia tuir lolos iha fulan-agostu nia fila ba Malazia halo tratamentu, maibé tanba servisu dezafiu politika entaun nia la ba halo tratamentu, ne'e mak nia saude mos ladiak", dehan nia ba jornalista sira iha Rezidensia Farol, kuarta horseik (14/09).

Tuir Marii, katak, Prezidente Partidu ne’e, la husik sigaru no nafatin fuma, ida ne’e mós afeita ba nia saúde.

"Nia tenke ba duni halo kontrolu, tanba tuir lolos ba iha fulan agostu, agora nia la ba, mais tenke ba ona, maibé hein nia bele lao ho ain rasik,"dehan Marii.

Entretantu, kona ba Eis-Prezidente Republika Timor-Leste, Francisco Guterres Lú Olo nia saúde, ne’ebé dadauk ne’e halo hela tratamentu iha HNGV, mediku sira seidauk bele fó sai ninia rezultadu tanba seidauk iha autorizasaun husi pasiente rasik.

“Ha'u tenke ser husu ba pasienta hatan mak ha'u foin bele fó sai, kona-ba atu halo transferensia ba nia moras no nia kondisaun Jeral ha'u labele ko'alia, tanba ekipa mediku atende hela no seidauk fó nia progresu, hafoin bele fó,” dehan Diretór Ezekutivu HNGV, Alito Soares.

Enkuantu, Eis Prezidente Republika hanesan mós Prezidente Partidu Fretilin ne’e, hahú baixa iha HNGV iha loron 12 fulan setembru tinan ne’e.