Projetu sira ne’e aprezenta husi Ministru Obras Públikas, Abel Pires da Silva.
“Ohin Konsellu Ministru, hahú dahuluk ho desizaun proposta husi Ministru Obras Públika hodi delibera no autoriza prosedimentu aprovizionamentu nian, liu husi konkursu públiku internasionál no realizasaun despeza ba obra públika sira kona-ba reabilitasaun estrada sira," dehan Ministru Prezidensial Konsellu Ministru, Fidelis Leite Magalhães, iha Palasiu Govern, kuarta ne’e (14/09).
Enkuantu, nia dehan, estrada sira ne’ebé atu reabilita mak hanesan, estrada husi Manatutu ba Laklo, ho valór globál ne’ebé estima mak US$ 8.315.330,44 no estrada husi Aileu (Be’cluru) ba Likidoe Laklo, ho valór globál ne’ebé estima mak US$ 25.154.925,51.
Aleinde, estrada husi Alas ba Wedeberek, ho valór globál ne’ebé estima mak US$23.232.296,32 no estrada urbana Maliana nian, pakote I, ho valór globál ne’ebé estima mak US$ 16.314.392,06 no mós estrada urbana Maliana nian, pakote II hanesan estrada prinsipál ho valór globál ne’ebé estima mak US$ 23.587.019,36.
Entretantu, Governu mós autoriza adjudikasaun kontratu públiku sira ba reabilitasaun, husi seksaun Laga ba Baguia ho pakote IV no husi seksaun Kelikai ba Ossu, pakote III ba estrada munisipal sira.
Nia akresenta, molok ne’e Konsellu Ministru aprova ona hodi loke konkursu ba reabilitasaun estrada Kelikai ba Ossu, nune’e iha ona rezultadu husi CNA katak, iha ona kompañia manan na’in ba iha projeitu realibilita estrada refere.
