Proposta lei ne’e aprezenta husi aprezenta husi Ministru Finansas, Rui Augusto Gomes.
“Iha OJE 2023 ne’e, reseita sira Setor Públiku Administrativu nian hanesan US$3.156.922.141, no despeza Setor Públiku Administrativu nian hanesan US$3.155.715.306, inklui Fundu Kombatente Libertasaun Nasionál, orsamentu sira Seguransa Sosiál nian no ba Rejiaun Administrativa Espesiál Oekuse Ambeno (RAEOA),”dehan Ministru Prezidensial Konsellu Ministru, Fidelis Leite Magalhães, iha komunikadu ne’ebé Online INDEPENDENTE, asesu, kuarta ne’e (14/09).
Nia hatutan, despeza sira ba servisu no entidade Administrasaun Sentrál ho valor dolar amerikanu millaun rihun $2,8.
Aleinde, despeza sira ne’ebé prevee ba Seguransa Sosiál ho valór dolar amerikanu millaun $235,7 no Rejiaun Administrativa Espesiál Oe-Kusi Ambenu (RAEOA) ho montante dolar amerikanu millaun $120.
Nia dehan, se la inklui orsamentu ne’ebé prevee ba Fundu Kombatente Libertasaun Nasionál, 33% husi orsamentu, sei aloka ba kuadru institusionál, 35% ba kapitál sosiál, 11% ba dezenvolvimentu ekonómiku, 18% ba dezenvolvimentu infraestrutura no 3% ba fundu kontinjénsia.
Enkuantu, projetu ba proposta lei ne’e prevee alterasaun balun iha taxa impostu seletivu ba konsumu nian, kompara ho ida ne’ebé define iha OJE tinan 2022 nian, liuliu, masin-midar no produtu konfeitaria, ba oin sei iha taxa impostu dolar amerikanu $1 ba kilograma ida.
Ho nune’e, bee kahur ho masin-midar ka edulkorante ka aroma seluk, no bebida sira la ho alkohol, la inklui sumu ai-fuan ka produtu ortíkola, ba oin sei iha taxa impostu dolar amerikanu $3 ba litru ida.
Nune’e, valór taxa impostu atu aplika ba tabaku no produtu seluk mai husi tabaku, ba oin sai husi dolar amerikanu $50 kada kilograma ba dolar amerikanu $100 kada kilograma.
Ba karreta sira ho ninia valor aas liu duké dolar amerikanu rihun $10, ba oin sei iha taxa impostu pursentu 10, karreta sira ne’ebé ho ninia valor aas liu dolar amerikanu rihun $25, ba oin sei iha taxa impostu pursentu 25, no karreta sira ne’ebé ho ninia valor aas liu duké dolar amerikanu rihun $50 sei iha taxa impostu pursentu 30.
