Movimentu Universitáriu Timor-Leste (MUTL) la konkorda ho desizaun suspensaun, sira hakarak Parlamentu Nasionál halo kanselamentu ba leilaun.

Portavós MUTL, Atanásio Belo hatete, lider bankada haat FRETILIN, CNRT, PD no Frente Mudansa foin lalais hasoru malu ho estudante sira deklara katak atu kansela leilaun karreta Prado ne'ebé deputadu iha intensaun atu leilaun.

“Maibé ohin (Sesta, (25/8)) iha konferénsia imprensa nia rezultadu ne’e oin seluk fali tanba sira deside halo de'it suspensaun ba alienasaun karreta”, tenik nia, iha Uma Fukun PN, horisehik.

Nia esplika, deklarasaun ne’e kontráriu ho rezultadu enkontru ho lider bankada sira. Ne’e duni, tuir loloos Prezidente Parlamentu Nasionál fó oportunidade ba lider bankada sira atu ko’alia sai rezultadu enkontru entre MUTL ho sira, maibé lider bankada sira ne’e rejeita hotu-hotu nonook.

“Ami hanoin katak sira hakarak atu politiza fali rezultadu enkontru lider bankada sira halo hamutuk ho ami deside halo kanselamentu”, dehan Atanásio.

Tanba ne’e, MUTL la satisfás ho proklamasaun Prezidente Parlamentu Nasionál nian ne'ebé atu suspende de'it alienasaun. Tanba ne’e, MUTL sei organiza nafatin estudante, joven no povu Timor tomak kontinua halo manifestasaun hasoru Parlamentu Nasionál to’o halo kanselamentu ba leilaun.

“Sira la kansela ami sei kontinua organiza malu hodi halo manifestasaun ida ne'ebé boot liu agora ne’e, to’o iha tomada pose ba IV lejizlatura mós ami sei kontinua halo manifestasaun”, dehan Portavós MUTL.

Antes ne’e organizasaun MUTL halo ona asaun protesta hasoru deputadu sira tanba polítika leilaun karreta Prado ne’e. Rezultadu manifestasaun ne’e hamosu violénsia balun iha Dili laran ne’ebé estraga edifísiu públiku balun, inklui veíkulu Estadu nian.