Iha serimonia inaugurasaun ne’e, partisipa mós husi Sekretaria Ezekutiva PNSD, Claudina Ximenes, Prezidente Autoridade Munisipiu Aileu, Abel da Conçeição, Reprezentante Embaixadór Australia, Rebecca Dodd, Diretór Jeral Desentralizasaun Administrativu, Belarmino Filomeno Neves, no Reprezentante husi Ministeriu Finansas, Cesar Melito ho Prezidente Autoridade Postu Remexio.
“Ohin loron inaugura UNP ho unidade 9 iha suku Liurai, konstrui liu husi PNDS iha Postu Administrativu Remexio, Munisípiu Aileu, ne’ebé iha tinan kotuk halo hotu ona,”dehan nia iha Suku Liurai, tersa (21/02).
Governante ne’e hatutan, tuir dadus iha Suku Liurai Uma Naroman ba Povu hamutuk unidade 12 konklui ona iha tinan 2022.
Ho nune’e, iha tinan 2023, Oitavu Governu Konstitusional sei konstrui mós UNP unidade 9 ba suku refere.
“Tanba ne’e, antes governu ne’e nia mandatu remata ita sei aloka uma hamutuk 21 mai iha Suku Liurai,”haktuir nia.
Ministru haktuir, UNP ne'e konstrui ba populasaun sira ne’ebé presiza duni, ba sira ne’ebé kbi’it seidauk iha atu halo uma, sira presiza duni fatin ida ne’ebé dignu hodi proteze sira husi loron manas, udan, no kalan toba nian.
Ministru afima, oitavu Governu Konstituisional liu husi Primeiru Ministru, Taur Matan Ruak oferese ba komunidade sira, tanba governu fó prioridade ba populasaun sira atu bele hela iha uma ida ne’ebé dignu, tuir duni Konstituisaun RDTL, artigu 58, kona ba hela fatin katak, “ema hotu iha direitu ba nia an, nia familia atu iha uma ida ho nia dimensaun no kondisaun diak, moos no konfortu atu bele iha intimidade ba ema idaidak no privasidade familiar”.
Entretantu, Governu kompremete atu programa UNP ne’e, sei kontinua halo uma ho unidade 3.600 ba populasaun sira iha Timor-Leste.
Tan ne’e, iha tinan ida ne’e PN aprova ona orsamentu hamutuk dolar amerikanu tokon U$63, husi Orsamentu Jeral Estadu (OJE) 2023.
“Oitavu Governu Konstituisional iha tinan ida ne’e aloka ona orsamentu atu harí UNP hamutuk unidade 3,600 iha TL, tamba ne'e sekretariadu tekniku PNDS iha semana oin sei halo sosializasaun ba programa ne’e iha suku nomós aldeia sira, atu bele identifika benefisiariu sira to’o fulan Abril tinan ne'e,”tenik nia.
Molok ne’e iha tinan 2021 Governu aloka ona orsamentu dolar amerikanu tokon U$25 hodi konstrui UNP hamutuk 1.254 uma-kain sira.
Aleinde, iha tinan 2022, Governu mós tau orsamentu hamutuk tokon $75, hodi konstrui UNP ho unidade 5.000 iha teritoriu Timor laran hotu.
Iha fatin hanesan, Sekretaria Ezekutiva PNDS, Claudina Soares Pinto, hatete, projetu ponte rua ne'ebé inaugura ne'e finasiamentu mai husi Governu Australia.
Enkuantu, projetu Uma Naroman ba Povu mai husi OJE.
Entretantu, Xefi Suku Liurai, Jacinto da Costa Silva hato'o agradese ba oitavo Governu, tanba povu Suku Liurai bele hetan naroman.
