“Zinko ne'ebé fahe ba povu sira, mai husi fundus minarai no osan povu nian, tanba ne’e Governu fó fila fali ba povu liu husi Programa Nasional Dezenvolvimentu Suku,”dehan Diretór Jerál Dezenvolvimentu Rural (DJDR) Rosito Guterres, iha Suku Dokurai, kinta (18/05).

Tanba ne'e, Diretór Jerál husu ba komunidade sira atu labele fiar lia bosok sira ne'ebé dehan osan ne'e mai husi Nasaun Australia.

Nia dehan, maske Eleisaun besik ona, maibé sira nafatin distribui zinku tanba ne'e programa Governu nian, no bainhira eleisaun liu tiha mós sira kontinua distribui zinko to'o mandatu remata.

Iha fatin Hanesan, Xefi Suku Dukurai Rafael Soares Maia hato'o agradese ba ekipa nia servisu ne'ebé to'o ohin loron bele distribui tan zinko ba nia benifisiariu hamutuk 37.

"Ohin loron povu hamutuk 37 mak sei simu kalen, maibé atu hatete de'it katak ida ne'e la to'o, tanba komunidade barak mak sei halerik hela," nia esplika.

Tanba ne'e, Xefi Suku husu ba Governu atu kria mekanizmu ida hodi hasai povu husi kiak no mukit, liliu kria Uma Naroman ba Povu.

Hodi nune'e, Xefi Suku lori benifisiariu nia naran hato'o agradese no orgullo ba estadu ne’ebé bele fasilita ona UNP ba sira, nune’e, husu ba estadu atu fó nafatin informasaun ba komunidade sira, atu nunue'e labele perzudika sira.