Ministru Administrasaun Estatal, Miguel Pereira de Carvalho, hatete, Governu asina ona diploma ministerial ida hodi rekoñese suku foun ho naran suku Assuilau.

Diploma ministerial ne’e ho númeru 19/2023, 03 Maio segunda alterasaun diploma ministerial 16/2017 de 31 de Marsu.

"Imi nia suku ne'e reskoñesidu ona no publika ona iha Jornal da Repúblika, aprova liu husi diploma ministerial ida ne'ebé ha'u rasik asina no públika ona iha loron tolu fulan-Maiu,” dehan Governante ne'e iha Assuilau Letefoho, Kinta (18/05).

Iha fatin Hanesan, Administrador Postu Administrativu Letefoho, António Manuel Soares hatete, Suku Dokurai nakfera ba Suku rua la’ós tanba poder maibé hakarak dada dezenvolvimentu ba komunidade sira tanba ne'e fahe ba rua.

"Ami povu suku Dokurai nakfera la’ós tanba poder, maibé tanba atu manan de'it dezenvolvimentu ba ami ne'ebé durante ne'e la dun asesu ba dezenvolvimentu," tenik Administrador.

Autoriedade Lokal ne'e hatete, lori Xefe Suku Dokurai no komunidade sira nia naran hakarak hato’o ba Governu katak, sira sei kuidadu suku foun ne’e ho diak.

Entretantu, Koordenadór Instaladór Tomas de Deus Maia, hato’o agradese ba Oitavu Governu tanba suku Dokurai luta  tempo barak ona hahú kedan iha tinan 2016 no ohin loron iha ona rezultadu.

"Ami hakarak suku ketak no foun, atu nune'e dada dezenvolvimentu mai ami nia suku hodi bele hare ferik no katuas sira ne'ebé hela iha ne'e la'o labele ona, hodi ajuda fali sira liu husi dezenvolvimentu ne'ebé mak iha," dehan Koordenador.

Entretantu, Suku Dokurai iha aldeia hamutuk 13, husi numeru ne'e, aldeia ualu (8) tama iha Suku Dokurai no aldeia lima tama iha Suku foun Assuilau.

Enkuantu, aldeia lima ne’ebé tama iha Suku foun ne'e mak hanesan, Lakau, Asui-Leten, Asui-Kraik, Hatu-Hei no Eratoi, ne'ebé ho total populasaun hamutuk 3.000.