Armindo Maia husu ne’e hafoin ezerse nia direitu votu iha eskola Ensino Báziku Central (EBC), Faról Díli, Domingu (21/05/2023).
“Ohin mai partisipa iha eleisaun Parlamentár 2023. Ita haree katak buat hotu la’o ho di’ak no espera katak, husi ne’e eleisaun ne’e la’o nafatin ho di’ak to’o votasaun ne’e taka,” nia hateten.
Hanesan atuál Ministru Edukasaun iha oitavu governu durante mandatu tinan rua nia laran esforsu hodi hadi’a kualidade edukasaun, hanesan infraestrutura, problema ba professór sira nian inklui bolsa méritu sira.
Armindo Maia espera katak, governu foun ne’ebé mai ne’e liu-liu ba Ministru foun ne’ebé nia knaar atu kaer Ministériu Edukasaun, kontinua ezerse serbisu ne’ebé atinje ona atu nune’e bele fó kualidade edukasaun ne’ebé di’ak ba estudante sira.
Husu ba governu foun mai presiza hametin no habelar, signifika, hametin buat ne’ebé oitavu governu halo ona no hadi’a buat ne’ebé seidauk hadi’a, atu nune’e bele haburas no habelar buat hirak ne’e.
