Nia haktuir mai partisipa enkontru regular ho Primeiru Ministru hodi atualiza serbisu balun Ministeriu Administrasaun Estatal nian prinsipalmente preparativus eleisaun jerál 2023 nian ne'ebé sei realiza iha loron 21 Maiu tinan ne'e.
Preparativus prinsipal sira relasionadu ho realizasaun eleisaun informa ona ba Primeiru Ministru mak Resensiamentu iha rai liur, Resensiamentu Eleitoral no atualizasaun baze dadus no hahú ona iha loron-1 Marsu to'o loron 30, informa mós kona-ba Resensiamentu no atualizasaun ba iha rai laran.
"Alende ne'e ha'u mós informa ba Primeiru Ministru kona-ba preparativus lojistiku atu realiza eleisaun, enprinsipiu STAE hanesan orgaun Eleitoral ida iha kondisoens sira hotu atu bele realiza eleisoens ne'e," dehan nia, hafoin iha Palásiu Governu, horisehik.
Ekipamentu ne'ebé mai atu halo hodi fasilita realizasaun eleisaun maioria barak mak to'o ona sei falta tan balun hanesan tinta no iha tempu badak sei halo testu ho partidu polítiku sira, espera iha fim Abríl to'o inisiu Maiu tinta sira ne'e to'o ona iha ne'e, depois sei haruka ba sentru votasaun sira.
"Tinta sira ne'ebé mak STAE sosa tantu ne'e ami halo despeza ida purvolta 350 Mill dolares amerikanu hanesan ne'e, ne'ebé mak Orsamentu hotu-hotu governu liu husi Ministeriu Administrasaun Estatal transfere ona ba UNDP no UNDP mak agora ne'e iha Faze kompra sira," nia dehan.
Tinta ne'e kompra husi nasaun sira ne'ebé durante ne'e fornese tinta ba eleisaun sira iha hanesan Dinamarka, hanesan nasaun sira ne'ebé estadu meritus sira ne'e mak produs tinta sira ne'e, UNDP babain ba kompra tinta iha nasaun sira ne'e.
Entretantu, Ministeriu mós informa kona-ba enkuandu mais atu hasae taxa partisipasaun iha populasaun sira ne'e mak aumenta sentru votasaun sira no mós estasoens votu iha territóriu atu nune'e aumenta 25% husi totál votasaun no estasaun votasaun ne'ebé mak utiliza iha eleisaun Parlamentar.
Dadus atualizadu ne'ebé mak STAE konsolida mak dadus Dezembru nian ne'e mak 800 Mill, agora rezultadu husi atualizasaun no Resensiamentu Eleitoral ne'e so iha fulan Abríl mak STAE foin bele atualiza.
Enkuantu termu lei loron 30 antes eleisaun STAE tenki iha ona dadus fiksu ida kona-ba eleitor sira ne'ebé mak resensiadu ona ho sira ne'ebé mak dadus atualizadu ona.
Aumenta taxa partisipasaun Timoroan sira ne'ebé mak iha direitu atu vota iha sira nia votus ne'e mak STAE aumenta sentru votasaun sira ne'ebé uluk eleisaun prezidensiál 1200 agora sae ba 1500, Estasoens votus sira iha eleisaun prezidensiál 1500 agora aumenta ba 1900.
"Tantu meius ida atu ita hodi sentru votasaun ba besik liu ita nia populasaun sira, agora husi inisiativa ne'ebé Governu halo hodi altera lei Eleitoral Parlamentu Nasionál mós iha meiu balun ne'ebé ita utiliza hodi fasilita Eleitoral sira hodi realiza vota," nia salienta.
Soke Dekretu retriativu lei ida ne'e vetadus husi Prizidenti Repúblika tantu inisiativa sira ne'ebé di'ak governu hanoin hakarak halo atu fasilita eleitor sira ba vota ne'e labele konkretizadu. Orgaun Eleitoral STAE ho Governu foti medidas hotu atu bele garante ema barak liu tan Partispa iha taxa Eleitoral.
