Reprezentante Canosiana Balide, Madre Guilhermina Marçal hatete, nia parte hasoru Primeiru-Ministru (PM) Kay-Rala Xanana Gusmão, husu apoia finanseiru, hodi kontribui ba programa formasaun no edukasaun ba joven sira, ne’ebé realiza dezde tinan 2018.
“Ami ko’alia kona-ba ba ami-nia programa treinamentu ba foin sa’e sira iha Ataúru ne’ebé ami presiza apoiu ruma husi Governu atu bele tulun ami, ami-nia programa ne’e hala’o ona iha tinan 2018 maibé tanba Covid-19 entaun buat hotu enterompido,” dehan Madre ba jornalista sira iha Palásiu Governu, Tersa (30/07).
Madre hatutan, atu hadi'a kualidade joven sira nian iha futuru, tenki liuhusi formasaun no edukasaun.
“Problema globál mundu ohin loron nia afeita tebes ba parte finanseira sira iha mundu ne’e la’os ema ida ema hotu-hotu, ita hakarak hadia kualidade formasaun no edukasaun ba futuru ne’ebé di’ak liu entaun presiza prepara jovem sira,” dehan Madre.
Entretantu, ba asuntu ne’e, Primeiru-Ministru sei tau konsiderasaun, tanba programa ne'e ba ema hotu nia di'ak.