Embaixadór ne’e hatete, objetivu hasoru Xefe Governu hodi husu orientasaun diretivas kona-bá oinsa atu hala'o knaar hanesan embaixadór hodi asegura no salvaguarda ba interese nasionál entre nasaun rua nian.
“Ohin atan-oan ha’u mai hasoru Primeiru-Ministru para husu orientasaun diretivas oinsá mak bele hala’o ha’u-nia knaar hodi bele asegura no salvaguarda ba interese nasionál nasaun rua ne’e nian,” dehan Embaixadór iha Palásiu Governu, Tersa (30/07).
Nia hatutan, nasaun Timor-Leste nia fronteira liga direitamente ho Indonézia.
Tanba sai Embaixadór reprezentante Timor-Leste iha Indonézia, tenke komporta-aan hodi kumpri no ezekuta polítika sira.
Kona-ba rekonsiliasaun, diplomata ne’e rekoñese, Timor-Leste ho Indonézia iha relasaun espesiál tebtebes no Amizade, atu hakle’an no haforsa liután relasaun entre ema ho ema.
Timor-Leste mós iha relasaun diplomátika ho Indonézia desde husi Restaurasaun Independénsia iha tinan 2002, ne’ebé estabelese kooperasaun iha área seguransa, polítika, ekonómiku, sósiu-kulturál no seluk-tán.
Bazeia ba relasaun entre Indonésia liuhusi área oioin ne’e, nia promete, sei esforsu atu nafatin iha kooperasaun hirak ne’e ho Indonézia, nune’e Indonézia mós apoiante prinsipál Timor-Leste nia adezaun bá ASEAN.
Kona-ba nia servisu iha Indonézia, nia promote, durante mandate nia sei servisu maka’as atu hetan solusaun ida di’ak-liu bá kestaun soberania, la’ós de’it bá fronteira rai-maran nian maibé, mós bá fronteira tasi no futuru fronteira aérea.
Hafoin hasoru Primeiru-Ministru, Xefe Governu ne’e, orienta Embaixadór Roberto Soares, atu hala'o servisu ho di’ak hodi asegura interese nasionál, proteje másimu imajem kualidade no integridade Timor-Leste nian, maske nasaun ki’ik no foin hahú, maibé bele hetan respeita iha mundu internasionál.