Nia haktuir, durante ne’e Governu aloka orsamentu bo’ot hodi investe ba setor justisa hanesan, Tribunál, Ministeriu Publiku no Defensor Publiku, maibe realidade hatudu sistema justisa saidauk la’o loos no moras todan hela.
"Ha'u atu informa, desde 2002 to'o 2023 hare husi aspetu rekursu finanseiru, governu investe barak liu ba setor justisa, tribunal sira deit gasta ona millaun $80, Ministeriu Publiku millaun $70 no Defensor Publika kuaze millaun $20," deklara Lucia Lobato iha Salaun Tower, Fatuhada, Dili, (05/12).
Nia argumenra, airin tolu hanesan, tribunal, ministeriu publiku no defensor publiku hamriik hamutuk para justisa bele la'o di’ak, maibé harw ba orsamwntu ne’ebe gasta ona, nia husu ba Governu presiza tau atensaun didi'ak bainhira atu preve orsamentu jeral estadu hodi aloka ba setor justisa.
"Ida-ne'e ita foin koalia kona-ba orsamentu jeral estadu nian ne'ebe preve ba setor justisa mak ne'e, seidauk ko'alia kona-ba orsamentu ne'ebe apoiu internasional ba setor justisa hamutuk $150 Milloes", katak nia.
Koordenadora ne'e deklara dadus orsamentu jeral estadu ne'ebe gasta ba setor justisa, hafoin nia gasta tempu semana ida iha Ministeriu Finansas (MF) hodi asesu dadus hirak ne'e.
"Ha'u gasta ona tempu semana ida iha Ministeriu Finansas atu rekolha dadus sira-ne'e, ida-ne'e dadus sira ha'u hetan publikamente asesu, kona-ba numeru osan ne'ebe gasta ona, osan apoiu hosi internasional $150 milloes", nia espika.
"Ne'ebe total orsamentu jeral estadu ita-nia Governu gasta ona ba setor justisa, ita ko'alia asesu ba justisa ne'ebe povu rasik halerik hela ba ne'e kuaze gasta ona hamutuk $50 milloes, tanba ne'e to'o ona tempu atu hare didi'ak, tanba governu fakar orsamentu ona ba setor justisa", nia dehan.
Nia haktuir, kada tinan iha orsamentu jeral estadu governu fakar ona orsamentu ho montante bo'ot, maibe governu rasik sei-dauk hare didiak lalaok setor justisa nia paradeiru lolos to'o ona iha ne'ebe.
"Ha'u hetan ona dadus hosi Ministeriu Finansas ba orsamentu jeral estadu kada tinan gasta ne'e, tanba kada tinan ida gasta orsamentu ba setor justisa kuaze total milloes $50, ida-ne'e dadus konkreta, ha'u la inventa dadus hosi Ministeriu Finansas, maibe justisa laiha Valor ba povu", nia hto'o.
"Ha'u sei halo reforma duni, parese iha fulan marsu 2024 fo sai ona rezultadu, tanba hare katak, ita-nia setor justisa ne'e moras todan hela, desorientadu, halo povu la fiar ba justisa, la asesu ba justisa ikus mai nasaun sei mout, tanba governu fakar osan laiha rezultadu", tenik nia.
Nia informa,sistema iha setor justisa ninia lalaok kuaze tinan 20 ona ukun-an, komunidade sira sei halerik ba justisa, tanba konsidera justisa balun lalos, no justisa la to'o povu nia leet, maske orsamentu lubuk ida gasta ona ba setor justisa.
