Lucia, oan-feto husi Orlando Soares no Madalena do Carmo, ne’ebé moris iha Mausiga iha 28 Jullu 1994 ne’e hahú estudu iha eskola primaria Dare, Ainaro, husi 2002-2006, hakat ba Pre-sekundariu iha eskola 20 Agostu Dare Boetua, husi tinan 2006-2009, no kontinua ba iha Sekundariu iha eskola 1912 Same, Manufahi, husi 2009-2012.
Hafoin termina ninia estudu iha nivel Sekundariu, Lucia ne’ebé iha maun no bin na'in 6 ne’e kontinua ba nivel universitariu iha Universidade da Paz (UNPAZ), Departamentu Jestaun, fakuldade ekonomia, husi tinan 2012-2016.
Iha tina ida ne’e, Lucia kandidata aan Xefe Suku tanba hakarak atu luta ba direitu kbi'it la'ek no feto sira-nia partisipasaun iha prosesu dezenvolvimentu suku ne'ebé sei menus tebes.
"Ha'u mai ho vontade hodi kompete, atu promove igualdade jeneru, haburas demokrasia, no halakon injustisa ne'ebé durante ne'e akontese," dehan nia ba jornalista INDEPENDENTE foin lalais ne'e.
Razaun seluk, nia dehan, durante ne’e seida'uk iha feto ida mak lidera suku Mausiga, tanba ne'e mosu inisiativa ida hodi hatudu katak iha suku refere la'os de'it mane maibé feto mós bele sai ema númeru ida.
"Durante ne'e feto nia partisipasaun minimu liu, seidauk iha feto ida mak lidera suku ne'e ate a data. Tanba ne'e mak tempu to'o ona feto bele sai lider, no prontu atu servi."
Lucia afirma, bainhira eleitu ba xefe suku Mausiga, programa prinsipal ne'ebé sai ninia prioridade atu implementa mak sei hakbesik saude ba povu, hakbesik atendimentu ba povu, liu-liu ba ferik no katuas sira, ne'ebé labele ona la'o ho distansia do'ok.
Ba tratamentu dokumentu no simu osan idozu, nia hatutan, autoridade suku sei komunika ho parte relevante atu bele to'o iha sira-nia hela fatin hodi halo atendimentu.
Programa prinsipal seluk ne'ebé presiza urjentimente rezolve mak eletrisidade, bee-moos no estrada.
Tinan barak, nia dehan, povu hasoru situasaun ne'e, tanba ne'e bainhira eleitu nia kompromete aan katak sei komunika ho parte kompetente par rezolve problema ne'ebé iha.
Alende ne'e, nia mós kompromete katak bainhira eleitu ba xefe suku sei esforsu hodi promove produtu lokal suku Mausiga, no sei esforsu husu apoiu husi ministeriu relevante hodi tulun no hadi'a fatin turizmu komunitaria ne'ebé iha.
Lucia mós sei ajuda prepara kondisaun ba povu, nune'e bele hasa'e no haburas produsaun iha suku laran ba bem estar sosiedade ninian.
