Afirmasaun ne’e hato’o husi Xefe Estadu, Francisco ‘Lú-Olo’, liu husi nian intervensaun bainhira hala’o diálogu ho veteranu sira iha Palasiu Prezidensiál, Bairru Pité-Dili, Kuarta (6/12).

Tuir nia, ligadu ho situasaun polítika ne'ebé daudaun ne’e, nu’udar Prezidente Repúblika iha dalan rua ne'ebé bele solusiona kestaun hirak ne’e maka diálogu no konstituisaun. Polítika ne’e maka uza diálogu ho lider partidu polítiku hodi buka solusaun ba konstituisaun, nune’e mós dalan ida seluk maka tuir konstituisaun haruka.

“Hanesan ha'u dehan metan… metan hotu. No hakarak ohin ko'alia ida, aban mós ko'alia nafatin, hodi labele fó buat ne'ebé la di'ak ba povu”, dehan Lú-Olo.

Objetivu husi reuniaun ho veteranu sira atu hamutuk hodi partilla hanoin balun relasiona situasaun polítika ne'ebé la’o daudaun, nune’e bele buka dalan hamutuk hodi fó apoiu ba malu atu rezolve situasaun ne’e.

Iha fatin hanesan, veteranu António Ai-Tahan Matak, hateten nu’udar Prezidente Repúblika iha obrigasaun boot atu haree hodi solusiona polémika polítika nu’udar Konstituisaun fó kompeténsia.

Nia dehan polémika polítika daudaun fó inserteza ba povu, tanba kestaun ne'ebé daudaun ne’e eziste maka minoria no maioria, maibé tuir loloos ida ne’e la'ós fukun.

Tanba ne’e, obriga Prezidente Repúblika atu haree, karik bele foti desizaun tenke tuir Konstituisaun labele foti desizaun hodi influensia ba kestaun ruma.

Nune’e, José Manuel ‘Nakfilak’ hateten, nu'udar ema ne'ebé majistratura iha konstituisaun ne'ebé hakarak no halo konstituisaun, daudaun Prezidente Repúblika hamutuk nafatin konfiansa atu bele foti desizaun bainhira tensaun polítika kontinua la’o nune’e.