Sekretáriu Estadu Konsellu Ministru no Komunikasaun Sosiál, Matias Boavida hateten, programa VII Governu remata ona, maibé sei fó ba jurista sira hodi halo revizaun molok to’o iha deputadu sira nia liman.

Nune’e, nia dehan, presiza tebes jurista sira haree tuir programa VII Governu nian, karik iha planu balun seidauk kompleta bele halo hotu kedas antes diskusaun.

“Dokumentu finaliza ona hein de'it tanba jurista sira haree no tetu di'ak liután atu labele mosu tan fallansu sira hanesan uluk”, dehan nia, iha Palasiu Governu, Kuarta (6/12).

Nia dehan, jurista sira haree di'ak liután, atu nune’e sistemátiku liután bainhira aprezenta iha ba deputadu sira iha Parlamentu Nasionál bainhira iha prosesu diskusaun nia laran.

Ne’e duni, Matias promete katak, bainhira programa ne’e rasik jurista sira avalia hotu hakarak ka lakohi Governu iha devér lori no aprezenta ba Parlamentu Nasionál hodi diskute.

 AMP Mantein Mosaun Sensura

Antes ne’e, Primeiru Ministru, Mari Alkatiri hateten, segundu programa Governu nian sei aprezenta ba Parlamentu Nasionál bainhira deputadu sira husi bloku Aliansa Maioria Parlamentár (AMP) retira sira nia proposta mosaun sensura.

Maski nune’e, Deputadu bloku AMP husi bankada KHUNTO, José Agostinho da Silva hateten, mosaun sensura ne’e AMP hatama bazeia ba desizaun ne’ebé foti hamutuk. Ne’e duni, sei firme nafatin hodi defende polítika saida mak sira halo ona.

Ne’e duni, Prezidente Parlamentu Nasionál tenke kria konvokatriu ida ho lider bankada para ajenda ba plenária nian, tanba to’o agora seidauk.