Nia sente la kontente ho situasaun polítika ne’ebé hahú aproveita hodi ataka malu, liuliu entre veteranu sira.

“Ha'u triste kuandu ha’u haree iha Parlamentu Nasionál ne'ebá halo konsentrasaun ba Ministru Defeza”, dehan Lere, iha Palasiu Prezidensiál, Bairru-Pité, Kuarta (6/12).

Ne’e duni, veteranu ne’e aviza ba veteranu hotu-hotu iha Timor laran tomak atu unidu nafatin. Labele monu ba tentasaun lasu polítiku ne’ebé ema balun halo hodi soran sira.

Nia hatutan, nu’udar veteranu labele influensia ba buat rua, maibé hamutuk nafatin tanba hanesan mate restu ne'ebé agora sei moris.

Lere akresenta tan, sira ne'ebé mai husi ai-laran biar kiak, halo sala, tenke hamutuk nafatin ho hanoin atu lori nasaun ne’e ba oin.

Ikus liu, nia apela ba lideransa nasionál sira hamutuk iha hanoin ida hanesan uluk iha tinan 24 iha ai-laran hodi konfia ba malu nafatin lori nasaun ne’e ba propriedade.