Tuir dadus, total uma-kain iha munisipiu 12 ne’ebé simu subsidiu hamutuk uma-kain 298.119, signifika hela uma-kain 102,985 mak seidauk simu subsidiu.

Diretór Jeral MSSI Rui Manuel Exposto informa, ekipa MSSI hahú hala’o prosesu pagamentu iha 9 Juñu, no to’o iha 15 Juñu uma-kain 195,214 mak simu ona subsidiu.

Durante prosesu pagamentu, Rui dehan, iha uma-kain 6.580 mak halo reklamasaun tanba naran la sai iha lista.

“Naran sira ne’ebé atu halo reklamasaun ne’e ami fó loron 15 hodi verifika dadus sira ne’e ida por ida, hafoin ami halo pagamentu,” dehan Rui iha salaun MSSI Kaikoli, Tersa(16/06).

Uma-kain Rihun 23 iha Oekusse sei Simu Subsidiu

Entretantu, tuir dadus husi MSSI, uma-kain hamutuk rihun 23 iha Rejiaun Administrativu Espesial Oekusse-Ambeno (RAEOA) mak sei simu subsidiu.

Vise Primeira Ministra no Ministra Soliedariedade Sosial no Inklusaun Armanda Berta dos Santos informa daudaun ne’e MSSI kordena ona ho Ministeriu Finansas hodi hahú prosesa subsidiu ba RAEOA.

Tuir nia, pagamentu ba RAEOA sei hahú iha fulan Juñu nia laran tanba dadus kompletu ona.

Molok ne’e, Ministru Finansas Fernando Hanjam hatete, nia parte kordena ona ho MSSI atu hato'o dadus uma-kain iha RAEOA ba MF hodi bele prosesu.