Tuir informasaun, ema importante iha CNRT ne’e ba halo tratamentu iha Melbourne, Australia.

Ba ida ne’e, Asia Justice and Rights (AJAR) lamenta ba Ministériu Públiku (MP) ne’ebé husik de’it Kalbuadi ba rai li’ur.

Diretór Ezekutivu AJAR Luis Sampaio dehan, bainhira ema ida ne’ebé hetan TIR atu ba rai li’ur hodi halo tratamentu saúde, MP tenke konfirma duni ema ne’e ninia estadu mediku katak nia moras duni ka lae.

“Tanba sa mak nia (Kalbuadi) bele sai ba rai li’ur, serake tebes duni ka lae ba halo tratamentu saude,” dehan Luis ba jornalista INDEPENDENTE via telephone, Tersa (16/06).

Diretór Ezekutivu ne’e tauk esperensia sira ne’ebé akontese ona iha tempu kotuk akontese fila fali.

“Ita iha esperensia ba korruptor sira halai sai ba rai li’ur. Primeiro, Emilia Pires. Segundo Tiago Guerras ho nia fen Chan Fon-Fon,” dehan nia.

Tuir nia, loloos MP labele ho fasil fó lisensa ba Kalbuadi sai ba rai li’ur tanba, molok ne’e Kalbuadi hatudu ona indikasaun balun katak nia mafia ida.

“Uluk  nia iha ona indikasaun katak nia ne’e ema mafia ida. Tanba iha momentu kuandu polisia atu ba kaer, nia halai ba iha parlamentu hodi sai deputadu par subar an iha imunidade.”

“Agora, tanba saida mak prokuradór la seriu ba kazu ida ne’e, kazu koropsaun ne’e nia modura penal ne’e boot liu tinan rua, loloos ne’e Ministériu Públiku ba kaer kedas,” dehan nia.

Tan ne’e, nia afirma, Kalbuadi ninia viajen ba rai li’ur hatudu katak MP fraku no la seriu.

“Tanba sira fraku ne’e mak ema korruptor sira halai lakon hotu,” dehan nia.

Entretantu, molok ne’e, Kalbuadi nia defeza, Fernando Carvalho hatete, Kalbuadi daudaun ne’e iha hela Melbourne, Australia tanba asuntu saude.

“Nia intensaun ba ne’e ba semana ida ka rua nia fila-fali mai Timor, tanba  agora dadaun ne’e nia sei iha prosesu TIR nia laran, kuandu iha dentro prazu (loron) 14 nia laran, nia bele husu lisensa ba MP,” dehan nia.

Maibé, nia dehan, hafoin to’o iha Australia pandemia Covid-19 hahú mosu no nasaun barak, inklui Australia no Timor-Leste, deside taka fonteira ho nune’e difikulta nia fila mai TL.

Nia esplika, ninia kliente la presiza autorizasaun husi MP bainhira hakarak sai ba rai li’ur, importante labele liu loron 14.

“Ha’u rasik nu’udar defeza halo karta ida, kuandu nia (Kalbuadi) fila husi Australia nia bele ba presta deklarasaun iha Ministériu Públiku,”dehan nia.

Entretantu, Kalbuadi hetan TIR husi tribunal tanba deskonfia komete kazu partisipasaun ekonomia no negosiu, brankamentus kapitais, no burla agravadu.