Xefe Suku ne’e rekoñese nia fasilita duni estudante sira ne’e tanba durante ne’e estudante hirak ne’e hela iha kos no iha periodu estadu emerjensia sira la konsege fila ba sira-nia munisipiu.

Bernandino dehan, subsidiu ne’ebé governu oferese atu ajuda komunidade sira ne’ebé durante estadu emerjensia hela de’it iha uma, tan ne’e, nu’udar autoridade lokal nia mós fasilita estudante na’in 10 resin ne’ebé hela iha kos no la konsege fila ba sira-nia munisipiu hodi asesu subsidiu.

“Durante fulan rua resin estudante sira ne’e hela de’it iha kos no sira labele fila ba sira-nia munisipiu tanba karreta la halai. Durante implementasaun estadu emerjensia ne’e sira susar tebes atu hetan aihan no bukae ruma husi inan-aman sira tanba transporte publiku la halo operasaun,” dehan Xefe Suku ne’e iha Sede Suku Madohi, Tersa (16/06).

Nu’udar autoridade lokal, nia hatete, nia hatene ninia povu mak hetan susar durante implementasaun EE.

“Nu’udar autoridade lokal ha’u hatene ha’u-nia ema sira, durante ne’e sira iha ne’e de’it.susar tebes inan-aman sira atu haruka buat ruma husi foho mai, tanba kareta mós la halai hotu. Agora objetivu husi subsidiu ne’e atu fasilita komunidade sira atu bele asesu ba nesesidade baziku tanba estadu bandu sira durante fulan rua hela iha uma de’it, agora tanba sa mak sira la bele hetan fali?” dehan nia.

Tanba identifika estudante sira ne’ebé hela iha nia suku hasoru problema, Bernandino dehan, nia orienta Xefe Aldeia sira hodi foti dadus husi estudante na’in 10 resin hodi prosesa atu simu subsidiu.

“Nu’udar umanu ha’u sente triste, ha’u katuas ona no la vale ona buat ida, maibe estudante sira ne’e, sira mak sei sai futuru ba nasaun ne’e nian. Ha’u Xefe Suku Madohi prontu atu tama komarka tanba defende ona estudante sira ne’e atu simu subsidi,” dehan nia.

Tan ne’e, Xefe Suku ne’e garante katak nia sei kontinua esforsu atu estudante sira ne’ebé nia parte identifika ona sei simu subsidiu.

“Ita-nia sentimentu nu’udar humanu ne’e ita tau iha ne’ebé? nu’udar Xefe Suku ne’ebé besik liu no hatene situasaun iha baze ha’u tenke defende ha’u-nia ema sira ne’ebé durante ne’e sofre duni iha tempu EE. Ha’u lakohi ha’u xefe suku ha’u han no sira tuur nonton de’it, maske ha’u la estuda lei, direitus umanus, maibé ha’u kompriende, ida ne’e kontra ha’u-nia sentimentu nu’udar umanu ida,” nia deklara.