Iha Tersa (16/06), Vise MEJD hakat ba palasiu governu hodi hasoru-malu ho Primeiru Ministru Taur Matan Ruak.

Hafoin sorumutu ho PM Taur, Vise MEJD ne’e dehan, nia hasoru PM hodi despede Xefe Governnu.

“Ohin (horseik) hanesan agradesimentu ida ho Primeiru Ministru, no Primeiru Ministru hato’o nia agradesimentu ba serbisu ne’ebe hala’o durante tinan rua nia laran no to’o momentu ida dadaun (sai ema) independente no sei koalia barak iha tempu oin, kona pozisaun iha partidu KHUNTO ninian,” dehan Vise MEJD ne’e iha palasiu governu.

Nu’udar membru governu no alin, João hatete, prontu kumpre no ezekuta orientasaun saida de’it ne’ebé ulun-boot sira atu foti.

“Ohin mai hasoru atu rona direitamente husi exelensia Primeiru Ministru oinsa kontribuisaun durante ne’e, nune’e ohin hanesan kontribuisaun ikus hanesan Vise Ministru Edukasaun  hamutuk ho Primeiru Ministru,” dehan nia.

Nia dehan, partidu KHUNTO bele delega ona ema ruma hodi substitui nia fatin, maske nune’e hanesan timor-oan sempre nafatin iha prontidaun atu fó kontribuisaun, la’os de’it nu’udar membru governu, maibé mós nu’udar sidadaun baibain.

“Ha’u husu ita-boot sira pasiensia hodi hein lia loos sei mosu mai, ha’u-nia obrigasaun defende lia loos, nu’udar Timor-oan prontu kontribui, koalia no defende lia loos, kontra buat ne’ebé la loos, nune’e ha’u la preokupa partidu KHUNTO atu foti see de’it mak atu mai, ne’e laos ha’u-nia parte, tanba dadaun (ha’u) laos membru KHUNTO, (ha’u) ema independente,”dehan Vise MEJD ne’e.

Nia afirma, sorumutu ho PM Taur ne’e konsidera hanesan despedida.

“Durante rona iha luron katak naran tama ka lae, ohin rona loos tiha ona, prontu ida ne’e mak kontribuisaun sai ho dignidade, lamete korrupsaun no la mete buat at iha institusaun, nune’e sai kontentente, ksolok, tanba kargu ida ne’e laos ema ida-nia kusta, ema timor-oan tomak nian, importante mak serbisu ho fuan moos, laran moos hodi hari institusaun ne’e lao di’ak no konsidera ema hotu, ne’e importante”.

Maske sai ona husi membru governu, maibé João dehan, nia la sente triste, maibé sente hetan previlejiu tanba iha oportunidade hodi serbisu hamutuk ho PM Taur Matan Ruak.