Xefe Governu husu ADN atu haree didi’ak implementasaun projetu sira no CNA tenke aprova didi’ak tanba bainhira halo di’ak povu sei hadomi no povu sei la fó buat ida maibé sei reza atu funsionáriu sira moris di’ak ho família.

“Ida-ne’e mak imi tenke sente iha imi-nia fuan, tanba imi halo ponte, estrada, no dada ahi. Buat sira ne’e halo bá povu tomak no povu kontente tanba imi halo buat di’ak. Ho konfiansa, fiar tomak katak imi sei hametin di’ak liután ADN no CNA. Dejezu katak, to’o loron ida kuandu ha’u haree imi servisu ho di’ak, moos, transparente, ho onestidade, ho kompromisu bo’ot, ita hotu sei dehan katak viva ADN, viva CNA no viva Timor-Leste tanba imi hetan servisu ida ne’e atu servi rai ida ne’e, la’ós atu sai funsionáriu de’it hodi simu saláriu,” dehan PM Xanana liu husi Komunikadu ne’ebé Online INDEPENDENTE asesu iha Pájina ofisiál GPM, Sesta (07/02).

Primeiru-Ministru mós bolu atensaun katak, bainhira halo ezekusaun bá orsamentu iha Fundu Infraestrutura mak la la’o ho di’ak maka tinan 2026 Xefe Governu rasik mak hasai hotu osan iha Fundu Infraestrutura nian.

Xefe Goveenu mos husu bá CNA ho ADN tenke eduka seitór privadu sira, bainhira kompañia ida halo lalais atu manán de’it osan, maibé ADN haree katak la kualidade entaun tenke hadi’a se la’e labele selu nune’e tinan tuir-mai sira halo fali buat seluk, sira halo ho di’ak liu.

Foin dadaun Primeiru-Ministru bá haree projetu ida iha Maliana la la’o tanba kompañia laiha ekipamentu, ida-ne’e mak Governu tau nafatin osan.

Entaun, buat barak tenke kurize, tanba Governu tau tiha osan barak maibé labele ezekuta hanesan de’it, Xanana Gusmão dehan ida-ne’e ADN nia servisu hodi haree didi’ak no tenke ezerse funsaun hodi kontrola no verifika.

“Ha’u bolu atensaun atu iha tinan ne’e komesa ho buat di’ak. Iha tinan 2025 nia rohan mak ita haree buat hotu kurizida no ema ida la reklama ema seluk. Buat ida la tama tán ha’u-nia tilun, anin fuik ne’e sempre mai tanba ema hotu hatene katak kuandu tama iha ne’e ha’u la dehan se mak dehan no kona-bá sé. Tanba ne’e maka buat ne’e tenke hakotu se lae ha’u tesi tiha imi-nia liman fuan,” PM Xanana bolu atensaun.

Husu tékniku sira ne’ebé foin lalais sai hosi Ministériu Obras Públikas tanba dezempeña la di’ak, labele bá atu binga fali iha ne’ebá. Iha karik ADN ho CNA mak sei sai hotu makelar, tenke hapara tiha ida-ne’e.

Biban hanesan, Ministru Planeamentu no Investimentu Estratéjiku (MPIE), Gastão Francisco de Sousa hateten, ADN iha kna’ar importante tebes tanba hahú hosi verifikasaun bá projetu to’o rekomendasaun atu halo pagamentu ne’ebé bele garante kualidade.

“Iha enkontru dala barak ne’ebé ha’u halo liu-liu ho ADN no CNA, ha’u sempre bolu atensaun tanba dezenvolvomentu rai ida-ne’e iha ita-bo’ot sira nia kabás. Ne’e duni halo servisu didi’ak bá, halo tuir regulamentu ne’ebé aprova tiha ona. Ida-ne’e mak importante tanba dignidade ita bo’ot sira nian laliu buat sira ne’e, liliu ezekusaun projetu iha terenu,” Ministru Gastão akresenta. 

Governante ne’e sempre bolu atensaun bá funsionáriu sira katak servisu tenke la’o tuir tempu ne’ebé  determina hamutuk tuir diagrama ne’ebé aprovadu iha Konsellu Administrasaun Fundu Infraestrutura (KAFI).

Tanba ne’e, Ministru husu atu labele demora pagamentu ka verifikasaun bá dokumentu hosi empreza sira tanba de’it hakarak buat ruma, buat sira ne’e la bo’ot liu dignidade ema nian.

Bolu mós atensaun bá CNA tanba iha informasaun barak ne’ebé Ministru simu hosi seitór privadu sira katak funsionáriu sira involve iha prosesu aprovizionamentu no nia husu katak bele involve maibé tenke la’o tuir regulamentu ne’ebé iha.