Iha Sabadu (8/2), maizumenus tuku ualu kalan, mosu sirkuitu eletrisidade iha uma ida. Ahi mosu husi fiu metan ne’ebé liga direita enerjia eletrisidade ba uma ne’e.
"Ahi ne’e la'os konslet husi fiu iha uma laran, la'e, maibé liu husi fiu metan liña jeral nian. Ami hakfodak haree ahi lakan tiha, ami iha uma laran tauk no trauma, ahi haan duni uma laran no vizinu sira konsege mai salva lori bee rega mate tiha ahi," dehan uma-nain, Dino da Costa ba Jornalista INDEPENDENTE, iha nia hela fatin, Domingu (9/2).
Bainhira kazu ne’e akontese, sira kontaktu ba tekniku EDTL no sira to’o kedas fatin, maibé sira halo de’it observasaun.
"Sira tekniku na'in rua mai duni horikalan, sira mai haree liu de'it, mais to'o agora mai haree oinsa atu rezolve, mais to'o agora ida nunka atu mosu mai. Sira mai dehan ‘ami ba agora prepara ekipamentu par atu atende’, mais sira la mai,” dehan nia.
Dino hatutan, bainhira tekniku EDTL nian la rezolve sei fó risku ba sira.
"To'o agora ami hein hela, mais ida nunka atu mosu mai,” nia lamenta.
Tuir loloos, problema ne’e tekniku EDTL mak tenke mai rezolve tanba laos problema sirkuitu iha uma laran, maibé sirkuitu iha fiu metan liña jeral nian.
Vitima ne’e lamenta tebes ho servisu EDTL nian. Tanba loloos EDTL tenke fó antedimentu lalais ba problema ne’ebé mosu.
Uma-kain seluk ne’ebé rabat-malu ho Dino nia uma, preokupa mós ho problema ne’e, tanba bele fó ameasa ba sira hotu.
"Uma sorin ne’e ahi lakan maka'as, depois ahi lakan rabenta, ha'u direita kontaktu ba EDTL, depois sira mai ema ida de'it mak mai ho kareta, nia mai putar tiha, nia dehan ‘hein tan lai, oras tan kareta boot mai’, maibé karreta ne’e la mai to'o agora," dehan Jorgina Maria Dina.
Sira preokupa tebes tanba udan mós tuun bainhira sirkuitu ne’e akontese.
"Hori kalan udan boot ami tauk loos, keta halo ba fiu metan iha uma leten ne’e sirkuitu nafatin, entaun ami toba de'it iha liur, kalan bo'ot hanesan né'e mak ami bá toba uma laran, ami toba iha sofa leten de'it, tanba ami tauk los," nia dehan.
Entretantu, Jornalista INDEPENDENTE koko halo konfirmasaun ho Vise Prezidente EDTL. EP, Julio Gonçalves de Jesus, maibé nia rekuza fó komentariu.
