Koordenadór Nutrisaun no Diatetika, Hospital Nasionál Guido Valadares, Francisco Ramos da Silva hatete, durante ne’e kompaña sira ne’ebé mak hetan oportunidade hodi fornese hahán ba pasiente sira ne’e maiória sei uza produtu importadu, tanba produsaun iha rai-laran sei menus.

"Hahán importadu la’ós 100%, ita han ida ne’e la'e, maibé liga ho ita nia produsaun iha rai laran menus, koserteza ita tenke uza duni hahán importadu, ha’u foti ezemplu hanesan na’an-manu, ita hakarak duni uza na’an referidu, maibé produsaun rai-laran mínimu teb-tebes, entaun susar, ho nune’e HNGV uza duni na’an importasaun”, dehan  Francisco Ramos da Silva ba jornalista sira, iha nia kna'ar fatin, Sesta, (07/25).

Nia dehan hahán ne’ebé kompaña prepara ba pasiente sira ne’e, la 100% mai husi ai-han lokál, hanesan na’an-manu, mina no seluk tan inklui ai-fuan balu sei uza  importadu,

“Ita hakarak uza produtu lokál hotu, de’it ne’e di’ak, maibé ita tenke haree bá ita-nia produsaun rai-laran no pasiente sira, mós han tuir oráriu ne’ebé mak estabelese ona,"nia dehan.

Maski nune’e, menu ne’ebé Hospitál Nasionál Guido Valadares prepara, la’ós na’an-manu de’it, maibé mós iha proteina balu, ne’ebé mensiona hotu iha menu, kompañia fornese tenke  tuir.

"Iha mós na’an-karau no manu-tolun, ne’ebé tuir nutrisionista HNGV nia supervizaun, katak kompañia sosa iha rai-laran, na’an fresku ne’ebé durante ne’e fornese bá pasiente. Iha ne’e ita la uza de’it na’an-manu, tuir menu ne’ebé iha,"nia informa.

Kona ba menu kada loron tenke troka malu, tuir sira nia akompañamentu naan manu no manu-tolu sira sosá iha loja, maibé naan karau no ikan sira hola duni produsaun rai laran.

"kona-ba  menu, loron 10 nian, ne’ebé troka-troka, ita uza na’an-manu, karau, ikan no manu-tolun. Iha ami-nia akompaniamentu loro-loron nian, bá sira-nia preparasaun, ami haree, katak na’an-manu no manu-tolun, sira sei sosá iha loja, maibé naan karau no ikan, sosá iha rai-laran,"nia haktuir.

liu-liu HNGV hakarak atu kompaña fornese ai-han lokál ne’ebé fresku bá pasiente, maibé problema stock la to’o no balun seidauk iha produsaun, iha rai-laran.

"Hanesan na’an manu, mina, masin no ai-fuan hanesan apel, sabraka, ne’e ita iha, maibé iha tempu de’it, tan ne’e kompaña tenke sosá iha loja, basa sira tenke prepara hahán tuir menu ne’ebé  ospitál fó"nia esplik.

Preparasaun ai-han bá pasiente iha HNGV, kada loron kompaña prepara hahán tenke to'o dala lima, hanesan matabisu, merenda dader tuku 10, han meudia, merenda lorokraik tuku 4 no han kalan iha tuku 7.

Entretantu  totál pasiente sira ne'ebé mak dadaun ne'e baixa iha HNGV, hodi asesu ba hahán kompostu husi adultu na’in 250,no labarik ki’ik 70 resin.