Komandante Jerál PNTL Komisariu Jerál Polísia Henrique da Costa hafoin partisipa iha serimonia entrega hikas Body Ró Lansa Atuasaun Rápida iha Komandu UPM sesta ne’e (07/02) ne’e esplika, kronologia husi akontesimentu ne’ebé akontese iha loron kinta (06/02/25) iha Munisipiu Vikeke ne’ebé video viral ka espalla iha Media Sosial hateten katak akontesimentu ne’e akontese duni iha Komandu Munisipiu Vikeke.
“Iha oras tuku ida meudia, membru sira deskansa atu han meudia nian maibé iha sidadaun ida ne’ebe maka nia tama ba iha Komandu Munisipiu Vikeke no nia tama mós ba iha fatin besik hela membru sira nian no sidadaun ne’e ba ho intensaun ladiak, primeiru atu sunu kareta Estadu nian ne’ebe maka para/estasiona iha ne’eba, nia mós atu sunu kareta sira ne’ebe sai hanesan evidensia para hela iha Komandu Munisipiu Vikeke, nia mós atu sunu edifisiu Komandu ninian”, dehan Komandante Jeral PNTL liu husi Komunikadu ne'ebé Online INDEPENDENTE asesu iha Pájina PNTL, Sesta (07/02).
Haktuir tan katak, Autoridade Másimu Instituisaun Seguransa ne’e salienta tan katak sidadaun ne’e mós hasai liafuan dehan katak fatin sira ne’e laiha moru, entaun sunu tiha, nia ho eskeru tenta atu sunu hafoin membru sira haree maka atu kaer nia, maibé nia halai liu uza motorizada ida, hafoin membru sira duni tuir hodi kaptura nia.
“Kaptura nia, membru sira mós hetan sasan iha nia isin lolon hanesan eskeru ka gas no iha mós tudik ida, signifika nia ho intensaun atu halo duni krime, ita nia Polísia halo kapturasaun, komunika kedas ho Prokurador no ho orientasaun ita halo kedas prosesu, sidadaun ne’e tuir informasaun katak nia mós funsionariu públiku ida, entaun prosesu tomak ita nia parte investigasaun Komandu Munisipiu Vikeke hala’o hela no hafoin ida ne’e sei aprezenta ba Ministeriu Públiku (MP)”, hatutan KomJer.
Komisariu Jerál Polísia ne’e apela ba komunidade sira bainhira iha problema partikular ou problema familia, la presiza ba hatudu hahalok ladiak sira ne’e ba fali iha fasilidade Estadu ninian ka ba fali membru sira ne’ebé hala’o hela servisu.
Entretantu, sidadaun refere ninia hahalok hatudu krime no nia mós primeiru kontra Kódigu Prosesu Penal ninian no segundu, nia kontra mós Lei Arma Branka No.05/2017 ninian.
Enkuantu, oras ne’e dadaun, sidadaun refere detein hela iha Komandu Munisipiu Vikeke, maibé nia familia sira mós ba to’o Komandu munisipiu hodi husu deskulpa ba iha Polísia ba hahalok ne’ebé sidadaun hatudu katak ladiak, maibé resposta ne’ebe Komandante Munisipiu Vikeke hato’o maka ne’e ninia erru maibé ne’e hahalok krime ninian, entaun Polísia nafatin prosesu hodi aprezenta ba iha MP.
