PM Xanana hato’o kestaun ne’e iha serimonia tomada posse ba Prezidente Konsellu Administrasaun no Prezidente Komisaun Ezekutiva, Bee Timor-Leste, Empreza Publika (BTL,EP), Gustavo da Cruz, no Vise Prezidente Konsellu Administrasaun no Konsellu Ezekutiva BTL,EP, José Filipe Ximenes Smith.

“Juramentu hatete katak labele iha konflitu intererese. Neduni husu ba imi na’in rua no sira seluk ne’ebé sei sai nu’udár komisáriu ezekutiva atu servisu ho laran, labele hanoin de’it hetan servisu hodi hetan de’it mak osan,” dehan PM Xanana liu husi nia diskursu iha salaun Komisaun Nasionál Eleisaun, Kaikoli, Tersa (29/10).

Tuir PM Xanana, povu Timor-Leste merese duni atu hetan bee ho di’ak tanba dala-barak populasaun tenke la’o to’o foho hodi buka bee-moos.

“Entaun jestór sira tenke servisu didi’ak hodi lori bee-moos ba populasaun,” dehan Xefe Governu ne’e.

Iha fatin hanesan, Prezidente Konsellu Administrasaun no Prezidente Komisaun Ezekuitiva BTL,E.P, Gustavo da Cruz, promete sei servisu didi’ak tuir kompeténsia ne’ebé atribui ona.

Gustavo konsidera knar ne’ebé nia simu la’ós oportunidade maibé responsabilidade polítika ba povu no nasaun.

“Ha’u sei asume responsabilidade ida ne’e tuir kompromisu ondra ne’ebé halo ona. Buat balun ita hahú halo ona, maibé seidauk bele responde hotu ezijensia povu no nasaun nian,” nia hateten.

Durante nia mandatu, Gustavo promete sei ajusta alvu sira planu negósiu BTL nian, hametin instituisaun tuir polítika Governu, no reorganiza di’ak liu tán prosesu sira ne’ebé iha ona, tantu iha rekursu umanu no operasaun manutensaun.

Ba atendimentu públiku, nia dehan, sei simplifika prosedimentu pagamentu ba kliente sira, proposta hasa’e tarifáriu, no aumenta tarjetu reseita kliente iha Dili to’o postu administrativu sira.

Aleinde ne’e, Gustavo dehan, sei re-ajusta orsamentu regularmente ba estensaun monitorizasaun kualidade bee iha munisípiu hotu-hotu.

Fó sansaun ba komunidade estraga bee

Primeiru Ministru, Kay Rala Xanana Gusmão, fó atensaun ba estrutura foun BTL.EP, atu indentifika komunidade sira iha kapital Dili no munisipiu sira ne'ebé estraga bee hodi afeita ba komunidade balun la asesu bee-moos.

"Iha Dili rasik povu barak sei sosa bee-moos, tanba ne'e imi Empreza Publika tenke ko'alia ho estatal, ko'alia ho Xefe Suku no Xefe Aldeia sira, hasai desizaun ne'ebé maka'as, tanba ha'u la'o haree fatin ida ne'e karreta ho motor mai fase estraga bee, mais ema sira husi sorin ne'eba dehan ‘ai… fó netik be'e mai ha'u’," dehan Xanana.

Tanba ne'e, Xefe Governu husu ba BTL,EP. tenke koordena ho instituisaun estadu sira seluk hodi kontola.

"Se la'e susar, estraga be'e, estrada mós fase hotu, ema atu fase de'it sira-nia lensu iha uma laran mos tenke hola bee hodi fase, mais fase kareta no motor bee estraga no sulin arbiru."

"Ne’e mak husu ba BTL koopera Ministériu no Autoridade Lokal atu fó sansaun ba ema ne'ebé estraga bee. Laho mós persiza bee, susuk mós persiza bee, maibé ema iha sorin laiha bee, ne’e mak problema," katak nia.