Nia dehan, lista ne’e haruka ba MAE hodi halo verifikasaun hafoin haruka fali ba suku, hodi halo pagamentu.

“Lista submete ona ba MAE, agora hein hela lista ne’e atu hatene uma-kain hira mak iha direitu atu subsidiu $200 ne’e,”dehan nia ba Online INDEPENDETE, iha knar fatin, Sede Suku Akadiru-Hun, kuarta horseik (30/11).

Kona ba loron atu halo pagamentu, Xefe Suku ne’e dehan, autoridade lokal sira, halo ona enkontru ho Ministeriu Solidariedade Sosial no Inkluzaun (MSSI), no deside ona katak, iha loron 5 fulan-Dezembru tinan ne’e, sei halo lansamentu ba pagamentu subsidiu $200.

Enkuantu, tuir nia, kona ba loron ne’ebé atu halo pagamentu iha Suku Akadiru-Hun seidauk fiksu, tan ne’e sira hein hela informasaun husi Ministeriu Administrasaun Estatal no Ministeriu Solidariedade Sosial no Inkluzaun Sosial.

Entretantu, tuir dadus, total uma-kain ne’ebé sai benifisiariu ba subsidiu $200 iha Suku Akadiru-hun hamutuk ema na’in 800, husi aldeia tolu mak hanresan, Aldeia Bedik, Nubadak no Kuluhun-De Baixo.

Enkuantu, molok ne’e, Sekretariadu Tékniku Pagamentu Sub-sídiu Fim do Ano ba Uma-Kain, Ministériu Solidariedade Sosiál no Inkluzaun (MSSI), João Coimbra hatete, preparasaun atinze ona 95%, tanba ne'e MSSI deside data tentativa ba pagamentu subsídiu $200 iha 6 Dezembru ne’e.

"Preparativu la'o nafatin, ami tenta hela koordena ho Banco Nasional Komersiu Timor-leste atu haree oinsa mak implementa fundus to'o iha nivel postu par depois bele implementa, ida ne'e mak ami halo daudaun,” informa João ba Jornalista Jornal INDEPENDENTE iha nia kna'ar-fatin, Kaikoli, Sesta (25/11).

Nia hatutan, MSSI kontinua koordena ho BNCTL hodi haree kalendariu atu prosesa osamentu tranferensia ba nivel munisipiu sira.

Tanba ne'e, nia hatutan, kalendariu pagamentu tenke ajusta mós ho BNCTL nian, tanba sira iha mekanismu hodi halo levantamentu no bele mobiliza fundu to'o konta bankaria kada suku.