Produtu sesta bázika ne’e fornese husi Kompañia Riverside Unipesoal Lda, ne'ebé hetan kontratu husi entidade implementador Ministerio Turizmo Komercio no Indústria (MTCI-Sigla Portugués).
Tuir kontratu kompañia ne'e distribui Cabazes 1.671 ba benefisiario sira iha suku Balibar, kompostu husi Aldeia haat (4) mak hanesan, Aldeia Tancae hamutuk benifisiariu na’in 439, Aldeia Loriko na’in 448, Aldeia Fatuloda na’in 373 no Aldeia Lakoto hamutuk benifisiariu na’in 411.
Ho nune’e, produtu ne'ebé kompañia fahe ba benefisiáriu sira 75% husi produtu lokal no 25% produtu mai husi rai liur, tuir kotasaun ne'ebé iha kompañia sei fahe produto item 18 kompostu husi produtu proteina, produtu karboidatu no produtu ijiene pessoal inklui produtu femenina.
Xefe Suku Balibar, Afonsu Pereira agradese ba Oitavu Governu Konstituisional liu husi programa sesta bázika, tanba bele apoiu aihan ba komunidade sira ne'ebé dadaun ne'e enfrenta hela no menus aihan.
Tan ne’e, nia parte, apresia mós ba governu nia polítika ne'ebé valoriza agrikultór lokál sira nia produto, tanba produtu sesta bázika maioria produtu lokal.
"Nu'udar autoridade lokál, ha'u agradese ba governu nia hanoin tanba bele implementa programa sesta bázika ida ne’e no sosa produtu sira ne'ebé ita nia komunidade sira kuda rasik no fahe fali ba sira, liu husi programa ne'e, hodi apoiu komunidade sira ne'ebé ohin loron balu aihan la too iha sira nia família, se bele programa ne kontinua nafatin ba oin," Xefe Suku Balibar, hatete, iha komunikadu ne’ebé Online INDEPENDENTE sita, kinta ne’e (01/12).
Nune’e, Xefe Suku ne’e garante, distribuisaun produtu sesta bázika iha Suku Balibar sei Lao ho susesso tanba komunidade sira kontenti ho produto husi kompañia.
Aleinde, kona ba lista reklamante, Xefe Suku, hatete, nia parte sei kordena ho Kompañia atu buka solusaun hodi resolve problema ne’e.
Entretantu, Benefisiáriu Angelina Martins expresa nia sentimentu kontenti no agradese ba governu tanba bele apoiu ona sira nia nesesidade liu husi programa sesta bázika no rekomenda ba governu atu kontinua programa ne'e ba oin.
"Hanesan ema kbiit la’ek, ha’u senti kontenti no agradese ba governu tanba bele hanoin ami hodi fahe ona hahan, ami husu governu atu nia programa ne'e se bele kontinua ba oin hodi bele ajuda netik ami," hatete Angelina.
