Enkuantu, formasaun ne’e hala’o ona durante semana rua nia laran, hahú husi loron 21 to’o 30 Novembru 2022, iha Salaun Kristal Vila-Nova Baucau.
Nune’e, objetivu husi formasaun ne’e mak atu fasilita ema ho defisiénsia matan sira iha Munisipiu Baukau, atu bele aprende oinsa atu lee no hakerek uza letra Braille.
Ho nune’e, tema ba atividade ne'e mak "Formasaun Letra Braille Ba Ema Ho Defisiénsia Matan Hodi Asesu No Partisipa Iha Prosesu Eleitoral".
Xefe Programa AHDMTL Lucioano Borges, husu ba partisipante sira atu iha semana rua nia laran aproveita oportunidade hodi aprende ho di'ak.
“Ohin loron 30 fulan Novembro hanesan loron enseramentu ba formasaun Letra Braille nian. Nune'e iha enseramentu formasaun nian Xefe programa AHDMTL agradese ba parte hotu ne'ebé suporta ona formasaun refere, no husu ba formandu sira atu nafatin aprende no aplika saida mak sira aprende ona,” Online INDEPENDENTE sita iha komunikadu, kinta ne’e (01/12).
Tan ne’e, nia parte husu mós ba partisipante sira ne’ebé tuir ona formasaun semana rua nia laran, atu uza oportunidade ida ne’e hodi aprende hod diak, atu nune’e sira bele asesu ba eleisaun ne'ebé independente, no labele dependensia husi ema seluk, hili tuir sira nia hakarak, tuir sira nia direitu rasik no labele izola an iha uma.
Iha fatin hanesan, reprezentante Prezidente Autoriedade Municipio Baucau nu'udár mós Diretóra Asaun Sosial, Rezinha de Sousa, agradese ba parseiru sira tanba bele suporta AHDMTL, hodi realiza formasaun ne'e, tanba dala barak ema ho defisiénsia matan bainhira ba ezerse sira nia direitu, familia mak ezerse hela sira nia votu.
Entretantu, partisipante ne'ebé partisipa iha formasaun ne'e hamutuk ema na'in 26 ne'ebé mai husi Posto Administrativo sira hanesan, Laga, Quelicai, Venilale, Vemasse no Baucau Vila.
Enkuantu, formasaun ne'e realiza tanba hetan suporta husi UNDP Core-TL no governu Japaun.
