Deklarasaun husi La’o Hamutuk ne’e relasiona ho planu husi Banku Sentral Timor-Leste (BCTL) atu halo estudu ba moeda foun Timor-Leste nian.

Peskizador Ekonómia no Agrikultura, La'o Hamutuk, Mariano Ferreira hatete, karik adezaun Timor-Leste ba Organizasaun Mundial Komersiu no ASEAN hamosu ezijensia kona-ba moeda, maibé presiza tetu mós ba ninia impaktu ba ekonomia rai laran.

Importante mós, nia dehan, di’ak liu halo ezersisiu oioin atu bele hadia ekonomia rai laran nune’e komersiu iha rai laran bele forte hodi apoiu ekonomia domestika.

“Tanba se ita-nia ekonómia rai laran mak hanesan hela agora, seidauk metin, intermus rendimentu domestika ninian, situasaun balun ne'ebé oinsá bele investe tan ba setór importante sira, entaun maske ita bele halo moeda foun dala-ruma ita-nia ekonomia ne'e bele monu liu," dehan Mariano, iha nia knar fatin, La'o Hamutuk, Bebora, Segunda (02/12).

Tanba, nia dehan, daudauk ne’e TL nia ekonómia sira sukat husi JDP ne'e tanba depende ba Fundu Minarai (FM). Se FM ne'e hasai tiha husi TL nia ekonómia ka nia JDP, TL monu kedas, tanba setór hotu-hotu depende ba osan husi estadu ka setór públiku ninian.

“Bainhira Governu halo planu orsamentu, Parlamentu aprova no orsamentu ida ne'e mak sikula iha rai laran no depois balun, barak, mak ba rai li'ur hodi kontinua importa sasán sira ne'e.”

“Entaun ida ne'e hatudu ona risku katak Timor-Leste nia ekonómia rai laran seidauk forte no seidauk iha produsaun ne'ebé naton no setór sira produtivu seidauk dezenvolve ho loloos par absorve orsamentu ne'ebé mak kada tinan Parlamentu aprova.”

TL nia ekonómia ne'e bele dehan estavel tanba maske hetan xoke husi esterna, ekonómia globál mais tanba uza moeda dollar amérikanu, TL nia ekonomia estavel hela.

"Entaun ita espera Banku Sentrál ninia estudu ne'e bele hatudu vantajen no desvantajen, risku bá planu futuru ne'e, depois de ita iha moeda rasik ita atu halo saida tan ho osan dollar amérikanu ne'ebé mak iha.”

“Moeda ne'e uza de'it ba merkadu rai laran ka uza ba komersiu international?, tanba Timor-Leste nia sentavus ida agora se ba troka iha Atambua ema sei bele troka, mais liu husi Atambua ba Kupang, ba Bali, ema la simu ona osan ida ne'e.”

Molok ne'e, Governador BCTL, Helder Lopez hatete, BCTL halo ona estudu lubuk ida kona-ba kria moeda no estudu boot liu mak halo ho Fundu Monetáriu Internasional, no rezultadu estudu sei fõ sai iha tinan ida ne’e.