Kada tinan, Organizasaun Mundial Saude (OMS) selebra Loron Internasionál ba Ema ho Defisiensia ho tema oioin. Ba tinan 2024 ne’e, OMS foti tema "Amplifying the leadership of persons with disabilities for an inclusive and sustainable future" ka “Hametin lideransa ema ho defisiensia ba futuru inkluzivu no sustentavel”.

Iha esperansa lubuk katak loron internasional ba EhD ne’e la’os de’it sai serimonia ne’ebé fó oportunidade atu forma liafuan furak ba EhD, maibé tenke sai hanesan oportunidade ba entidade tomak hodi tau matan ho seriu ba EhD.

Tanba iha Timor-Leste, tuir observasaun husi Fundasaun Hadomi Timor (FHT), estadu seidauk fó atensaun masimu ba EhD.

Direitór Ezekutivu FHT, Abrão Monteiro kongratula EhD ba sira-nia loron espesial ne’e.

Ba TL, nia dehan, importante liu mak estadu tau atensaun maka'as ba EhD, liu husi investe ba fasilidade no ekipamentu ne’ebé sira presiza.

“Iha nasaun hotu-hotu ema sempre fó prióridade mak ema ho difisiensia tanba ne'e lá'os nia mak husu moris mai hanesan ne'e.”

“Agora daudauk era teknolójia, entaun iha ona teknolójia, meius lubuk ida ne'ebé iha hodi bele ajuda ema ho defisiensia, entaun estadu tenke fasilita ho fasilidade no ekipamentu ne’ebé bele apoiu sira," dehan nia.

Diretór ne’e mós kritika ba kontrusaun fasilidade publiku balun ne’ebé la asesivel ba ema ho defisiensia.

“Hatene ona katak fó ona prióridade entaun tenke halo edifisiu ruma, eskola, Igreja, halo buat sira ne'e hotu tenke konsidera kondisaun ruma ba ema ho difisiensia. Lalika fatin dook, Palásiu Governu mós haree ema ho defisiensia atu ba leten araska, ida ne'e la fó ezemplu. Atu sesu ba edifisiu ruma la'ós tenke lift, maibé ho alternativu seluk ne'ebé bele apoiu ba iha ema ho difisiensia atu asesu,” dehan nia.

Iha fatin ketak, Vise Ministru Asuntu Parlamentar, Aderito Hugo da Costa, relasiona ho loron internasionál ne’e hatete, Governu no estadu Timor-Leste tomak dezde inisiu transforma antensaun sériu estadu ninian ba ema difisiennsia liu husi polítika orsamentu kada tinan.

Aleinde ne’e, nia hatutan, Timor-Leste ninia ajenda nasionál sira mós tau konsiderasaun ba ema difisiénsia sira.

"Tanba ne'e mak ho mementu selebrasaun loron difisiénsia sira hanesan ne'e, fó  relembra  nafatin ba entidade hotu-hotu, liu-liu Governu no estadu hodi  kaer nafatin prinsipiu sira ne'e, tanba ne'e prinsipiu universál ona iha Timor-Leste," dehan Aderito ba jornalista sira, iha resintu Parlamentu Nasionál, Segunda (02/12).

Tanba ne'e, nia hatutan, iha polítika setór sosiál, inkluzaun sosiál ne'e hola parte iha polítika estadu ninian.

Iha fatin hanesan, depuadu husi bankada CNRT Natalino dos Santos kongratula ema ho defisiensia ne’ebé sei komemora sira-nia loron.

“Ita sira ne'ebé ke hakarak festeza hamutuk ho sira enkoraza nafatin sira forte par atu bele kontribui bá ita-nia prosesu dezenvolvimentu," dehan nia.

Tuir nia, ema ho defisiensia iha direitu hanesan hanesan ho sidadaun ne'ebé la'ós defisiénsia.

"Ita iha direitu hanesan, ita iha dever hanesan nu'udar sidadaun Timor, hotu-hotu  direitu hanesan iha rai ida ne'e," katak nia.