Indultu ne’ebé Prezidente Repúblika oferese ne’e bazeia ba ninia kompetensia eskluziva ne’ebé previstu iha Konstituisaun Repúblika Demokratika Timor-Leste artigu 85, alineia i).

Iha Dekretu Lei ne’ebé públika iha Jornal Repúblika, iha 27 Novembru ne’e, PR Horta deside fó indultu ba prizioneiru na’in tolu.

Prizioneiru ne’ebé hetan ‘prezente’ indultu husi PR Horta mak hanesan: Arica da Silva, Ana da Silva Ximenes, no Casamiro de Jesus Santos.

Molok ne’e, Diretór Prizaun Gleno, Cristiano Salsinha informa, nia parte aprezenta ona lista indultu ba Ministériu Justisa hodi bele enkamiña ba Prezidente Repúblika hodi hetan indultu iha loron Proklamasaun Independensia Unilateral ba dala 49.

Nia hatutan, iha lista ba indultu ne’e, nia parte rekomenda prizioneiru na’in 15, inklui eis Padre Richard.

“Sira ne’ebé ami husu par atu hetan indultu ne’e maioria komete krime violasaun seksaul ba menor, omesidu rua. (kondenadu) violasaun seksual ne’e ba idade avansadu sira no mós haree ba iha sira-nia kondisaun saude tanba sira moras hela de’it iha prizun laran,” informa Cristiano ba Jornalista Jornal INDEPENDENTE via telefone, Sabadu (30/11).

Ba sira na’in 15 ne’e, nia dehan, balun hetan pena prizaun tinan neen resin, tinan sia resin to’o tinan 10 resin.

“Tanba sira kumpre ona metade de pena ne’e bele hetan indultu, maibé depende ba na’i Prezidente Republika,” dehan nia.

Maske aprezenta ona lista, nia dehan, nia parte seidauk hetan informasaun ka resposta kona-ba prizioneiru na’in hira mak hetan aprovasaun hodi hetan indultu.

“Ita hein de’it tanba to’o agora ami seidauk hetan notifikasaun husi tribunál, Ministériu (Justisa) no mós husi Prezidente Repúblika. Bainhira pedidu mai dehan katak sira nain hira mak atu hetan indultu, prizaun mós haruka sira ba ona nia familia sira,” dehan nia.