Xefe Estadu Maiór Jenerál F-FDTL, Majór Jenerál Lere Anan Timur hateten, harii governu ho objetivu atu serbí povu no Estadu. Sai membru governu la'ós atu aproveita ba individu sira ninia prosperidade. Ne’e duni, labele fó fatin ba sira ne’ebé ‘kaan-teen’ hodi husu kadeira.
“Sira ne'ebé husu kadeira ne’e labele fó tan kadeira. Ita ne’e atu serbí nasaun no serbí povu, labele aproveita sai membru Governu atu halo di'ak nia-aan, ne’e labele akontese”, dehan Lere iha Palasiu Prezidensiál Ai-Tarak Laran, horisehik.
Nia salienta tan, kuandu manan atu serbí Estadu, la'ós Estadu maka serbí fila-fali, kuandu partidu KHUNTO lakohi koligasaun tanba kadeira la to’o, FRETILIN ho PD ba oin nafatin, lalika hein.
Ikus liu, tuir Lere, jerasaun foun agora tenke sukat didi'ak kapasidade atu lori nasaun ne’e nia todan, tanba atu sai lideransa kuandu di'ak ema hotu basa liman, maibé monu ba susar, ida de'it sei maka lori todan.
“Ha'u foin daudauk rona KHUNTO, PD koliga forma Governu, maibé KHUNTO dehan fila-fali la aseita tan tanba kadeira la to’o ba sira. Ha'u husu ba timoroan sira husu ba lider hotu-hotu ita koliga la'ós atu hadau malu kadeira, ita koliga atu ukun ita nia rai”, dehan Lere.
Ne’e duni, nia husu labele aproveita situasaun agora atu buka fatin ida ba ema ida-idak ninian.
Tanba ne’e, nia konta tuir uluk sei iha ai-laran dehan katak, labele aproveita funu, maibé tenke serbí funu. Hanesan mós agora, manan eleisaun atu serbí Estadu la'ós serbí ba aan rasik.
“Uluk iha ai laran ami dehan katak labele aproveita funu, maibé ita tenke serbí funu ba nasaun, agora mós hanesan ne’e kuandu ita manan ita tenke serbí estadu la'ós estadu mak serbí fali ita,” tenik nia.
Ne’e duni, Lere husu ba timoroan hotu-hotu tenke iha sentidu Estadu, la'ós koliga hodi fahe kadeira, maibé koliga para hodi ukun.
Tuir nia, KHUNTO buka tan kadeira, lakohi hamutuk ho FRETILIN no PD di'ak liu tenke ba oin nafatin. Tanba partidu sira seluk iha sentidu Estadu, CNRT Xanana nu'udar veteranu iha domin ba nasaun ne’e. Nune’e mós ho PLP ne’ebé lidera husi veteranu Taur Matan Ruak.
Lere dehan, partidu CNRT ho PLP ema haree ba iha nia figura, maibé FRETILIN la'ós figura ema haree ba iha bandeira, tanba uluk ema barak maka mate ba partidu istóriku ne’e.
